Klei klưh hroh mâo leh adiê hjan sui mmông hlăm mmăt 28/6 ngă kơ sa nah gang êlan nah dlông giăm 20m ti alŭ 36, êlan Hoàng Hoa Thám, ƀuôn hgŭm 10, ƀuôn prŏng Đà Lạt klưh hroh hlăm brô 2-3h aguah hruê 29/6. Klei anei ngă kơ 2 boh sang ksak kbưi hŏng anôk tal êlâo, lăn boh tâo săr dơr lu mnuih.

Hlue si ayŏng Lưu Xuân Đua, mtâo êkei phung mâo klei truh, 2 čô tuôm hŏng klei truh jing hlâo ung mô̆ ti kdriêk Phú Hòa, čar Phú Yên, hŏng 10 čô mkăn mơ̆ng Phú Yên hriê mă bruă rŭ mdơ̆ng ti Đà Lạt. Hlăk mâo klei truh, knŏng 2 čô ung mô̆ anei pĭt hlăm sang. Êbeh 10 čô mkăn pĭt ti anôk rŭ mdơ̆ng ti djiêu anăn myun tlaih djiê. Leh mâo klei truh mtam, êpul bruă djŏ tuôm čar Lâm Đồng mjêč pŏk ngă bruă đru dŏng. Mâo 5 čô dưi hmao đru mơ̆ng kăm dlưh rai leh anăn ba dŏng mdrao./.