Êpul mă bruă mơ̆ng ƀuôn prŏng Hải Phòng mŭt leh hlăm krĭng Dak Lak čiăng mđup brei mnơ̆ng đru leh anăn păn kjăp boh klei čiăng mâo hdră kčah đru klă sĭt kơ mnuih ƀuôn sang. Ƀuôn prŏng Hải Phòng srăng ba nao 500 čô aê mdrao kơ čar Dak Lak msir bruă kơ klei mdrao mgŭn leh êa lip. K’iăng Khua Knơ̆ng bruă sang čư̆ êa ƀuôn prŏng Hải Phòng mđup brei thiăm ênoh prăk đru 40 êklai prăk, mđĭ ênoh prăk đu kơ Dak Lak hlăm gưl adiê hjan êa lip tal anei truh 50 êklai prăk. Mbĭt anăn, Hải Phòng đru kdrăp mnơ̆ng, êa drao, masin kar êa… duh kơ bruă gang mkhư̆ klei ruă tưp êdei kơ gưl êa lip, êngăp êa mâo ênoh êbeh 2 êklai prăk. Êlâo hĭn, ƀuôn prŏng tiŏ nao 21 phung thơ̆ng kơ bruă kơ klei gang mkhư̆ klei ruă tưp… nao đru kơ Dak Lak. Nguyễn Minh Hùng bi mklă, ƀuôn prŏng Hải Phòng mprăp leh čiăng đru kơ Dak Lak.

Leh mâo klei klah čŭn mơ̆ng Phŭn bruă kđi čar, Anôk dlăng bruă Đảng snăn ƀuôn prŏng Hải Phòng mâo leh hdră êlan đru kơ Dak Lak. Leh gưl êa lip, sa bruă yuôm bhăn jing bi doh wăl hdĭp mda leh anăn gang mkhư̆ klei ruă tưp. Hmei mâo leh hdră kčah klă klơ̆ng kơ bruă mprăp kdrăp mnơ̆ng mdrao mgŭn, mnuih mă bruă. Hmei mprăp leh leh anăn srăng đru mơ̆ng 300-500 čô aê mdrao hĭng Dak Lak ngă hdră gang mkhư̆ klei ruă tưp ăt msĕ mơh mdrao klei ruă.”

Ƀuôn prŏng Hồ Chí Minh iêô mkrum klei đru kơ Khánh Hòa leh gưl êa lip, mơ̆ng klei ksiêm mkă klei ruă - mbha êa drao amâo mă prăk, mkăp kdrăp mnơ̆ng, mdoh wăl hdĭp mda  truh kơ klei mkra mđĭ sang hră, anôk mdrao mgŭn leh anăn mđĭ lar sang tŭk knă amâo mă prăk kơ mnuih ƀuôn sang krĭng êngăp êa. Êpul nao leh ti anôk êngăp êlam ti Nha Trang, Diên Khánh, Khánh Vĩnh. Aê mdrao Phạm Minh Công, Êpul hgŭm phung aê mdrao mda asei ƀuôn prŏng Hồ Chí Minh, brei thâo phung aê mdrao hlăm êpul hmư̆ leh asăp leh anăn mphŭn nao mjêč, mprăp djăp ênŭm kơ bruă ksiêm mkă klei ruă ti krĭng êa lip:

Hlăm wưng bhiâo, hmei kƀĭn leh êpul nao mă bruă hlăm mlam mtam. Čang hmăng srăng kah mbha, đru sa kdrêč dleh dlan hŏng mnuih ƀuôn sang. Ăt jing thiăm ai tiê kơ mnuih ƀuô sang krĭng êa lip găn klei dleh dlan”.

Mbĭt anăn, êpul lŏ pŏk dŭm anôk tŭk knă, mkăp 10 êbâo - 12 êbâo hnư êsei/hruê čiăng duh kơ mnuih ƀuôn sang dŭm să, ƀuôn hgŭm luč liê kjham leh anăn êpu đru dŏng.  Sang čhĭ mnia Co.opmart - Êpul hgŭm bruă mnia blei ƀuôn prŏng Hồ Chí Minh ti Nha Trang mđĭ blei mnơ̆ng, rơ̆ng amâo mđĭ ênoh, amâo dưi kƀah mnơ̆ng hlăm wưng mjêč. Nguyễn Phước Lộc, K’iăng Khua dlăng bruă Đảng ƀuôn prŏng Hồ Chí Minh, bi mklă, ƀuôn prŏng srăng lŏ dơ̆ng đru kơ Khánh Hòa mâo boh phŭn, mơ̆ng klei ksiêm dlăng boh sĭt, mbĭt anăn mđĭ klei thâo bi hgŭm mkra mđĭ anôk bruă nah gŭ čiăng êdi:

Dŭm anôk bruă ksiêm dlăng, đru mkra mđĭ jih jang sang hră leh anăn anôk bruă mdrao mgŭn jhat rai, rơ̆ng kơ hđeh sang hră hnưm lŏ wĭt hriăm hră leh anăn anôk bruă mdrao mgŭn lŏ wĭt ngă bruă.”

Mđing kơ klei iêô mthưr mơ̆ng Knơ̆ng bruă čar kwar čar Dak Lak, hlăm dŭm hruê êgao, lu anôk bruă, êpul bruă hŏng mnuih ƀuôn sang krĭng nah Yŭ čar đru mguôp dŭm êtuh ton mnơ̆ng dhơ̆ng yuan aguah tlam, êa mnăm, čhum ao… mơĭt đru kơ mnuih ƀuôn  sang krĭng êa lip nah Ngŏ. Y Giang Gry Niê Knơng, K’iăng Khua dlăng bruă Đảng čar - Khua Knơ̆ng bruă mặt trận čar kwar čar Dak Lak brei thâo, bruă đru dŏng leh anăn mbha mnơ̆ng dhơ̆ng dôk dưi pŏk ngă mjêč.

Hŏng klei hgŭm hrăm mbĭt đru mguôp mơ̆ng mnuih ƀuôn sang hlăm čar leh anăn êngao čar, iêo jak dŭm anôk mnuih ƀuôn sang dôk, anôk bruă klei đăo knă êsei, đŭng điŏ… Čiăng hmao dŭ mdiăng kơ mnuih ƀuôn sang krĭng êa lip bi ktlah hjăn. Êngao anăn, hmei ăt lŏ dơ̆ng iêô mthưr, mă prăk leh anăn mnơ̆ng ƀơ̆ng huă, mnơ̆ng dhơ̆ng đru kơ mnuih ƀuôn sang hnưm hơĭt klei hdĭp mda.”