Dhar bruă mặt trận ƀuôn prŏng Hồ Chí Minh brei thâo, bruă iêo mkrum leh anăn tŭ mă mnơ̆ng đru dŏng kơ mnuih ƀuôn sang dŭm čar kwar Krah tŭ klei hmăi mơ̆ng adiê hjăn êa lêč dưi mâo boh tŭ dưn prŏng prĭn. Êpul mtrŭt mjhar đru dŏng ƀuôn prŏng tŭ mă leh êbeh 32.400 gưl klei mkrum mguôp hŏng ênoh prăk hlăm brô 245 êklai prăk. Mbĭt hŏng anăn jing hlăm brô 30.000 hruh êa drao gŏ sang, 70 tôn briah leh anăn giăm 1.400 tôn mnơ̆ng mnơ̆ng čiăng êdi mâo ênoh êbeh 14 êklai prăk.

Ƀuôn prŏng Hồ Chí Minh ăt tiŏ nao êdei êdâo, mnuih mă bruă čiăng đru kơ čar Khánh Hoà mgaih msir boh jhat yan adiê ngă, hlăm anăn, mâo mđup brei 50 êklai prăk đru mjêč, đru mkra wĭt 23 sang hră jhat rai leh anăn tiŏ nao 650 čô ngă bruă bi doh wăl hdĭp mda ti dŭm anôk hmăi kjham.

Hruê 24/11,  Anôk bruă gĭt gai kahan êa krĭng 4 lŏ dơ̆ng ba nao giăm 1000 čô lĭng kahan hŏng lu kdrăp mnơ̆ng ti dŭm krĭng hmăi kjham kyua êa lip ti Khánh Hòa leh anăn Dak Lak. Êpul kahan êa dưi mbha lu êlan, mkŏ mjing klei đru hwai mdoh dŭm pluh km êlan klông hlăm krĭng mnuih ƀuôn sang hdĭp mda; đru mđoh lăn lu ti 12 sang hră, 3 anôk bruă  Knơ̆ng bruă sang čư̆ êa, 1 anôk bruă mdrao mgŭn leh anăn giăm 100 boh sang mnuih ƀuôn sang hlăm dŭm alŭ wăl Đông Hòa, Tuy Hòa, Bình Kiến, Bắc Nha Trang leh anăn să Diên Điền.  Mbĭt anăn, dŭm anôk bruă hlăm kluôm krĭng ba leh kơ mnuih ƀuôn sang giăm 100  m3 êa mmih leh anăn lu mta mnơ̆ng dhơ̆ng mkăn mâo ƀung hdang krô, braih, êa ksâo, čhum ao, băn mŭng. Anôk bruă gĭt gai Êpul kahan krĭng 4 brei thâo hnơ̆ng bruă mă ăt adôk lu snăk leh anăn êpul kahan êa srăng lŏ dơ̆ng đru kơ dŭm alŭ wăl hlăm dŭm hruê ti anăp.

Ti Lâm Đồng, hjan hlĭm dŭm hruê êgao ngă truh klei klưh hroh kjham, bi kpăk lu bĭt êlan dơ̆ng phŭn. Phŭn bruă mkŏ mkra bi mguôp hŏng čar tiŏ nao êpul ngă bruă, êdeh êdâo waih mă lăn, boh tâo, bi kjăp taluy, bi hluh hnoh êa leh anăn ktuê dlăng soh sĭt yan adiê čiăng rơ̆ng klei êđăp ênang kơ mnuih ƀuôn sang. K’iăng khua phŭn bruă mkŏ mkra Lê Anh Tuấn brei thâo, anôk bruă dôk mjêč mgaih msir čiăng hnưm krŭ wĭt klei dŭ mdiăng mnơ̆ng dhơ̆ng leh anăn bi hơĭt klei ngă bruă. Bi ti Êlan dơ̆ng mrô 20 kčŭn čư̆ Mimosa, dŭm anôk bruă mdưm mta kñăm hlăm 10 hruê srăng bi hluh êlan êjai leh anăn bi leh jih jang hdră hlăm wang sa mlan. Lâm Đồng ăt mnă kơ dŭm alŭ wăl čŏng mâo hdră êlan bi mdrơ̆ng, ksiêm dlăng anôk arưp aram mâo klei klưh hroh čiăng mbĕ đuĕ mnuih ƀuôn sang tơdah čiăng êdi.