VOV4.Êđê - Tlam hruê 16/3, ti ƀuôn prŏng Hồ Chí Minh, Khua lăn čar Nguyễn Xuân Phúc nao leh ti Knăm ba jao Anăn knăl Pô Jhŏng ktang djă phao ktuang yang ƀuôn kơ Lữ Minh Châu, K’iăng khua hđăp Anôk bruă ngăn prăk mdê hjăn N2683, Khua hđăp knơ̆ng prăk knŭk kna Việt Nam. Bi ala phung khua kiă kriê Đảng, Knŭk kna, Khua lăn čar Nguyễn Xuân Phúc jao leh Anăn knăl Pô Jhŏng ktang djă phao ktuang yang ƀuôn kơ pô bi ala gŏ sang Lữ Minh Châu. Blŭ hrăm ti knăm anei, Khua lăn čar Nguyễn Xuân Phúc lač klă, hlăm ênuk bi blah ktang phĭt ti kwar Dhŭng, hŏng k’hưm jing K’iăng khua hđăp Anôk bruă ngăn prăk mdê hjăn, Lữ Minh Châu mbĭt hŏng mnuih mă bruă mbĭt mâo klei mĭn mrâo, bi leh jăk bruă klam đru kčĕ kơ Dhar bruă ngăn prăk gưl dlông kwar Dhŭng, amâo uêñ klei dleh dlan, suaĭ êmăn, jhŏng lehanăn mâo mnêč thâo hgao jih kdrăp ksiêm dlăng mơ̆ng phung roh čiăng dŭ mdiăng mnơ̆ng dhơ̆ng êđăp ênang truh dŭm êtuh êklăk dolar, mkăp kơ klei čiăng ba yua mơ̆ng hdră krŭ kgŭ kdơ̆ng kwar Dhŭng, bi leh jih bruă klam mâo Phŭn bruă kđi čar, Anôk bruă Đảng gưl dlông lehanăn Knŭk kna đăo knang jao bruă./.

H’Nêč pô mblang