VOV4.Êđê- Tlam mbruê 23/9, ti sang bruă kƀĭn ala mkŏ mjing leh knăm bi hdơr 30 thŭn hruê mkŏ mjing Dhar bruă lĭng kahan leh anăn klei êđăp ênang mơ̆ng bruă Kƀĭn ala leh anăn tŭ mă mêđai mă bruă mrô 1. Nao hlăm knăm mâo Khua lăn čar, Khua kiă kriê Êpul gơ̆ng bruă lĭng kahan leh anăn klei êđăp ênang Nguyễn Xuân Phúc, Khua bruă kƀĭn ala Vương Đình Huệ.

Hlăm 30 thŭn êgao, Dhar bruă lĭng kahan leh anăn klei êđăp ênang nao hgŭm hlăm lu mta phŭn mkra mlih, bi mbŏ hdră bhiăn phŭn thŭn 1992, mkŏ mjing hdră bhiăn thŭn 2013, boh nik jing dŭm hdră bhiăn răng mgang ala čar, mkŏ mjing êpul lĭng kahan, Êpul gơ̆ng bruă lĭng kahan leh anăn klei êđăp ênang, hluê ngă dŭm bruă klam hlăm klei ksiêm dlăng, dŭm klei hưn mdah mơ̆ng Dhar bruă hlăm klei bi klă mâo boh tŭ dưn, hnơ̆ng tŭ jăk, đru kơ knŭk kna, dŭm anôk bruă djŏ tuôm hmao mgaih msir klei êdu kƀah hlăm bruă hluê ngă klei bhiăn ala čar, đru mkŏ mjing klei mlih mrâo hlăm bruă ksiêm dlăng. Khua bruă kƀĭn ala Vương Đình Huệ mñă klă, hlăm wưng kơ anăp, Dhar bruă lŏ dơ̆ng čŏng đăo knăl boh sĭt, mđĭ hnơ̆ng tŭ jăk klei bi klă, klei ksiêm dlăng, hưn mdah dŭm boh klei kơ hdră êlan bruă lĭng kahan, klei êđăp ênang, boh nik bi êdah dŭm klei thâo săng, klei mĭn mrâo kơ bruă răng mgang ala čar.

Pô mblang: Y-Ƀel Êban