Klei hưn mdah lač klă, hruê 6/1/1946 jing gru kruăk yuôm bhăn pŏk sa ênuk gưl đĭ kyar mrâo mơ̆ng djuê ana Việt Nam. Klei tŭ mơ̆ng hdră ruah khua mñă klă leh klei dưi ngă phŭn mil pô mơ̆ng mnuih ƀuôn sang, mơ̆ng klei arăng ktư̆ juă krŭ kgŭ kdơ̆ng suă wĭt klei hnŭk êngiê, êđăp ênang, mkŏ mjing Ala čar kơ pô, mâo djăp ênŭm klei bhiăn, bi ala kơ jih jang mnuih ƀuôn sang hlăm lehanăn êngao ala čar, jing Knŭk kna ngă phŭn mil pô tal êlâo ti Ngŏ Dhŭng Asi.

Dăl hlăm 80 thŭn êgao, hŏng 15 wưng păn bruă, hlăm ya boh klei, Anôk bruă kƀĭn ala mâo leh klei đru mguôp yuôm bhăn hlăm hdră krŭ kgŭ kdơ̆ng kdrưh kơăm mơ̆ng Đảng, djuê ana, năng jing anôk bi ala kdlưn hĭn kơ mnuih ƀuôn sang, anôk bruă mâo klei dưi hĭn, anôk bi êdah klei thâo, klei mĭn, klei čang hmăng mơ̆ng djuê ana. Blŭ ti knăm anei, Khua gĭt gai Đảng Tô Lâm sa blư̆ dơ̆ng mñă, mơ̆ng gru kruăk hƀuê ênuk thŭn 1946, Anôk bruă kƀĭn ala Việt Nam amâo mdei đĭ prŏng, mñă klă bruă klam phŭn hlăm klei hdĭp bruă kđi čar mơ̆ng ala čar, jing klei bhiăn phŭn hlăm bruă mkŏ mkra lehanăn bi leh Knŭk kna yang ƀuôn ngă phŭn êngiê Việt Nam. Mđing truh 100 thŭn hruê mkŏ mjing Đảng (1930 – 2030), 100 thŭn mkŏ mjing ala čar (1945 – 2045) lehanăn hluê ngă klei čang hmăng ba Việt Nam jing ala čar đĭ kyar, sah mdrŏng, yâo mơak, Khua gĭt gai Đảng bi êdah klă bruă klam mơ̆ng Anôk bruă kƀĭn ala hlăm bruă mjing klei bhiăn đĭ kyar mâo boh tŭ yuôm, pŏk êlan kơ hdră mlih mrâo, kơ klei đĭ kyar pral lehanăn hơĭt kjăp mơ̆ng ala čar./.