Hlăm mnơ̆ng dhar kreh djuê ana, sang Yang Hùng leh anăn hruê hdơr djiê kơ mrao Hung jing klei bi knăl mơ̆ng ai tiê khăp kơ ala čar leh anăn ai ktang bi hgŭm jih jang mnuih ƀuôn sang. Klei bi hdơr kơ phung mtao Hùng jing leh knhuah dhar kreh, klei bhiăn djuê ana Việt Nam drei. Wăt tơdah ya bruă ngă, ti anôk, ya bruă ngă, grăp čô mnuih Việt Nam mđing kơ phŭn agha, mđing kơ aduôn aê atâo atiêt hŏng ai tiê mpŭ, hdơr knga. Thŭn 2023, Knăm ngă yang kơ Mtao Hùng leh anăn Hruê kăm dhar kreh – hiu čhưn ênguê mâo čar Phú Thọ mkŏ mjing mơ̆ng hruê 20 - 29/4/2023 (jing mơ̆ng hruê 1- 10/3 thŭn Quý Mão) ti ƀuôn prŏng Việt Trì, wăl kriê pioh hƀuê ênuk Sang Yang Hung leh anăn dŭm kdriêk, wăl krah hlăm čar.

Kdrêč knăm ngă yang mâo čar Phú Thọ gĭt gai mkŏ mjing rơ̆ng ngă jăk, yuôm bhăn, jiă kma klei êpul êya, kƀĭn hlăm dŭm bruă phŭn: Knăm ngă yang kơ Lạc Long Quân leh anăn myơr brui mngưi bi hdơr kơ Âu Cơ, Knăm ngă yang kơ mtao Hùng leh anăn myơr mnga ti rup “Awa Hồ blŭ hrăm hŏng phung knuă druh, lĭng kahan Êpul kahan ba anăp”, Knăm myơr brui mngưi ti dŭm sang yang Mtao Hung, dŭm anăn phung khua êmua ênuk Hùng Vương ti čar. Knăm myơr brui mngưi bi hdơr kơ phung Mtao Hùng ti dŭm kdriêk, ƀuôn prŏng, wăl krah hlăm čar.

Êngao kơ dŭm klei bhiăn mơ̆ng đưm, dŭm bruă knăm mơak thŭn anei mâo lu mta mrâo, mguôp kjăp hŏng hiu čhưn ênguê, mjing dŭm hdră ngă bruă Hruê kăm Dhar kreh – hiu čhưn ênguê, bi êdah knhuah dhar kreh krĭng lăn aduôn aê. Êdah êdi jing hdră mphŭn pŏk “Knăm mơak sang Yang Hùng leh anăn Hruê kăm dhar kreh – hiu čhưn ênguê lăn aduôn aê thŭn 2023” leh anăn “Knăm mnơ̆ng kriê pioh amâo êdah klă mâo Unesco yap” hlăk 8 mmông mmăt hruê 21/3/2023 ti wăl tač Hùng Vương; Klei kƀĭn trông lu ala čar “Klei bi kƀĭn hiu čhưn ênguê, dhar kreh, mnơ̆ng kriê pioh leh anăn klei đĭ kyar kjăp Việt Nam”, Klei bi lông luê leh anăn waih mran ti ênao Văn Lăng, klei bi lông čưng boh Hùng Vương, klei bi lông pah boh mă cúp Hùng Vương, knăm mơak hiu čhưn ênguê Yŭ Dưr thŭn 2023; Knăm mơak rang mdah mnia blei krĭng Ngŏ kwar Dưr – Phú Thọ thŭn 2023; Klei bi lông dhar kreh mnơ̆ng ƀơ̆ng mơ̆ng Đất Tổ; Knăm mơak dhar kreh leh anăn bi lông kdŏ mmuiñ kơ knăm hdơr kơ hruê djiê Mtao Hùng.

Êngao kơ dŭm bruă dhar kreh, mjuăt ktang asei mlei, hiu čhưn ênguê grăp thŭn, thŭn anei lŏ mâo dŭm bruă êdah kdlưn mkăn, bi mguôp plah wah dŭm bruă dhar kreh djuê ana leh anăn mrâo mtang mâo klei lar ƀar msĕ si: Klei rang mdah “Mnơ̆ng kriê pioh  dhar kreh, hiu čhưn ênguê dŭm krĭng ƀuôn prŏng Việt Nam”, knăm mơak ao dai hđeh điêt Việt Nam “mđing kơ phŭn agha, klei mdah ao dai Việt Nam, klei bi  lông wai êdeh  êpul Việt Trì pŏk mlar, mkŏ mjing êpul Famtrip “Hdră hiu čhưn ênguê jăk siam krĭng čư̆ čhiăng”… Mơ̆ng anăn, đru kơ phung tuê ƀuh klei bi hdơr kơ mtao Hùng leh anăn mnơ̆ng dhơ̆ng hiu čhưn ênguê mdê hjăn mguôp hŏng dhar kreh krĭng lăn Aduôn  aê đưm.

 Boh nik thŭn anei čar Phú Thọ lŏ dơ̆ng mtrŭt mjhar dŭm gŏ sang ti čar mprăp hlao êsei bi jăk, trei mđao čiăng bi hdơr kơ ai tiê aduôn aê atâo atiêt mơ̆ng djuê ana hlăm hruê 10-3 hlue mlan ƀlĕ. Hdơr hruê djiê kơ mtao Hùng hruê 10 mlan 3 hlue mlan ƀlĕ grăp thŭn jing leh anôk kčah mơ̆ng grăp čô mnuih Việt Nam, jiă kma dhar kreh djuê ana khăp kơ ala čar, bi êdah klei hdơr knga kơ phung mtao Hùng leh anăn phung ba anăp mâo leh ai tiê mkŏ mjing lăn čar leh anăn kriê pioh ala čar; mbĭt anăn mkra mđĭ êpul hgŭm jih djuê ana Việt Nam hlăm bruă mkŏ mjing leh anăn răng mgang čar kwar./.