VOV4.Êđê- Hruê 16/1 kơ anăp, ti Sang hră ksiêm hriăm kơ bruă kahan ksiêm yang ƀuôn, Hdră bruă myơr êrah Knăm kjuh Hrah tal 14 klă klơ̆ng mkŏ mjing. Hdră thŭn anei mâo klei mđing dlăng mơ̆ng phung knuă druh, dŭm Phŭn, dhar bruă, boh nik klei nao hgŭm mơ̆ng êbeh 40 čar, ƀuôn prŏng, tĭng srăng tŭ mă mơ̆ng 45 êbâo truh kơ 50 êbâo mrô êrah doh. Khădah ka klă klơ̆ng mphŭn pŏk, ƀiădah mơ̆ng mlan 11 thŭn dih truh kơ ară anei, dŭm anôk myơr êrah mơ̆ng Knăm kjuh Hrah ti 15 alŭ wăl mâo tŭ mă leh giăm 6 êbâo mrô êrah doh, mkăp kơ klei čiăng dŏng mdrao mnuih ruă hlăm wưng êlâo, hlăm lehanăn êdei kơ Têt Djuê ana Nhâm Dần 2022. 

Hŏng asăp hưn mthâo “Myơr êrah dŏng hdĭp mnuih – Klei hdĭp Kâo lehanăn Ih”, êbeh pluh thŭn mơ̆ng leh hruê m’ak Knăm kjuh Hrah maoa Hră klei mrâo Tiền Phong mkŏ mjing jing leh klei mtrŭt mđĭ ai prŏng grăp blư̆ truh thŭn mrâo, mâo klei mđing dlăng mơ̆ng lu anôk bruă, êpul êya lehanăn mnuih ƀuôn sang hlăm djăp gưl thŭn, krĭng kwar, djuê ana, anôk bruă nao hgŭm ba myơr êrah./.

Pô mblang: H’Nêč Êñuôl