VOV4.Êđê - Mmăt mbruê 6/9, ti Anôk bruă mđung asăp ala čar 58 Quán Sứ, Hà Nội mkŏ mjing Knăm mđup brei klei pah mni asăp blŭ Việt Nam thŭn 2022. Anei jing bruă bi hdơr 77 thŭn hruê mkŏ mjing Sang mđung asăp blŭ Việt Nam (7/9/1945 – 7/9/2022). Mphŭn pŏk knăm mđup brei klei pah mni Asăp blŭ Việt Nam, Khua Knơ̆ng bruă Sang mđung asăp blŭ Việt Nam Đỗ Tiến Sỹ bi mklă mơ̆ng grăp wưng đĭ kyar lăn čar, asăp blŭ Việt Nam mâo grăp čô mnuih ƀuôn sang đăo knang. Ƀrư̆ hlăm klei dleh dlan, huĭ hyưt, bi êdah klei jhŏng, bruă klam phung ngă bruă klei mrâo Sang mđung asăp blŭ Việt Nam.

Khua Sang mđung asăp blŭ Việt Nam mñă klă: Hlăm wưng bi mlih mrô, Sang mđung asăp blŭ Việt Nam brei mlih mrâo kơh dưi mđĭ lar klei ktang pô, brei mâo klei mbruă êdah kdlưn, jing hdră hâo hưn pral, hluh knông lăn. Leh 1 thŭn pŏk ngă leh anăn brei puăng, Anôk bruă mkŏ mjing klei pah mni Asăp blŭ Việt Nam thŭn 2022 mâo 5 klei pah mni mrô A, 9 klei pah mni mrô B leh anăn 11 klei pah mni mrô C kơ hnơ̆ng brei puăng. Hlăm anăn klei čih “Čŏng bi rai dliê knŭk kna mkuôm ngă êlan Ngŏ duôr Čư̆ Prŏng” mơ̆ng Anôk bruă sang mđung asăp blŭ Việt Nam ti Lăn Dap Kngư ăt dưi mđup brei klei pah mni mrô A kơ klei mrâo mđung asăp.

H’ Zawut pô mblang