VOV4.Êđê- Mlam mbrue (26/3), ti sang mmuiñ prŏng Hà Nội, Bruă êdam êra gưl dlông Cộng sản Hồ Chí Minh, Keh đru ba klei mbruă phung mda asei Việt Nam mkŏ mjing leh knăm mđup brei klei pah mni Phung mda asei Việt Nam kdlưn hĭn thŭn 2021. Êpul mkŏ mjing mâo hrŏng ruah lehanăn mđup brei leh kơ 10 čô jing phung mda asei kdlưn hĭn, lehanăn 9 čô phung mda asei Việt Nam mâo klei čang hmăng êdi kơ thŭn 2021. Anei jing jih jang phung mda asei mâo leh djăp mta bruă ngă tŭ jing mơ̆ng klei hriăm mjuăt, ksiêm duah klei kreh knhâo, mjuuăt asei mlei, hlăm klei duh mkra, lehanăn răng mgang lăn čar. Hlăm knăm mđup brei klei pah mni, phung mda asei Việt Nam kdlưn hĭn anei mâo leh klei mjĕ mjuk, bi yăl dliê hŏng jih jang mnuih kơ 3 mta kñăm “Klei hmăng hmưi, klei êpa mhao, hgao klei dleh dlan duh mĭn, lehanăn boh tŭ dưn klei thâo myơr. Hŏng jih jang klei yăl dliê bi êdah lu ai tiê klei khăp, phung mda asei Việt Nam amâo mâo djŏ knŏng ai tiê klei mbruă, klei thâo mĭn hlăm djăp mta kơ klei hdĭp, ƀiădah lŏ bi êdah ai tiê klei mbruă hlăm jih jang bruă đru mguôp hŏng yang ƀuôn, gĭt hlăm klei ngă bruă amâo mâo mdei kơ klei mđĭ kyar bi sĭt klei êpa mhao čiăng kơ lăn čar mdrŏng sah ktang kjăp./.

Pô mblang: Y-Khem Niê