Knăm mơak durian Krông Pač-  Dak Lak gưl tal 2 srăng bi djŏ ai phung tuê hŏng hnơ̆ng mkŏ mjing prŏng hĭn, lu mta bruă jăk leh anăn tŭ dưn hĭn. Anei jing klei bi klă mơ̆ng khua gĭt gai kdriêk Krông Pač, čar Dak Lak hlăm klei kƀĭn bruă klei mrâo hâo hưn kơ Knăm mơak durian Krông Pač gưl tal 2 thŭn 2024 mkŏ mjing aguah mbruê.

Hŏng akŏ Durian Krông Pač đĭ kyar leh anăn ñu kma, knăm mơak srăng mkŏ mjing mơ̆ng hruê 31/8 – 2/9/2024.Aduôn Ngô Thị Minh Trinh, k’iăng khua bruă sang čư êa kdriêk Krông Pač brei thâo: Kluôm kdriêk ară anei mâo hlăm brô 8000ha durian, mâo 1/3 ênhă pla durian ti čar Dak Lak. Wưng hrui pĕ thŭn anei mĭn tĭng mâo êbeh 92.000 tôn. Durian jing leh ana pla mjing phŭn ba wĭt prăk kơ mnuih ƀuôn sang ti alŭ wăl. Knăm mơak Durian kdriêk Krông Pač gưl tal 2 mâo hnơ̆ng mkŏ mjing prŏng hĭn, dưi mkŏ mjing jăk hĭn, lu mta bruă tŭ dưn hĭn čiăng lŏ bi mni kơ phung pla durian leh anăn klei yuôm mơ̆ng mta boh kroh anei ba wĭt.