VOV4.Êđê - Ƀri wưng bi hdơr 97 thŭn hruê klei mrâo cách mạng Việt Nam, aguah mbruê 21/6, ti Hà Nội, êpul bruă hâo hưn gưl dlông, phŭn bruă klei mrâo leh anăn hâo hưn, êpul hgŭm phung čih klei mrâo Việt Nam, klei mrâo yang ƀuôn bi mguôp mkŏ mjing Knăm mtrŭt mjhar klei bi lông “Mkŏ mjing wăl dhar kreh hlăm dŭm anôk bruă klei mrâo” mđing truh bi hdơr 100 thŭn hruê klei mrâo cách mạng Việt Nam (21/6/1925 – 21/6/2025). Knăm mtrŭt mjhar anei kñăm mđĭ hĭn klei thâo săng, bruă klam mơ̆ng gưl bruă Đảng nah gŭ, êpul êya bruă Đảng, khua gĭt gai anôk bruă klei mrâo, phung čih klei mrâo kơ bruă klam, klei yuôm bhăn mơ̆ng dhar kreh hŏng klei đĭ kyar ala čar, ăt msĕ hŏng klei đĭ kyar mơ̆ng dŭm anôk bruă klei mrâo, klei yuôm mơ̆ng mnơ̆ng dhơ̆ng klei mrâo leh anăn kơ hưm, klei đăo knang mơ̆ng pô čih klei mrâo. Mta kñăm jing mkŏ mjing anôk bruă klei mrâo dhar kreh, pô ngă bruă klei mrâo dhar kreh, mtrŭt mđĭ, bi lar klei sa ai, hur har nao hgŭm, mkŏ mjing klei bi lông bi ktưn klă klơ̆ng leh anăn mâo boh tŭ dưn čiăng kơ dŭm anôk bruă klei mrâo hluê ngă jăk bruă klam hlăm bruă kriê pioh, mkŏ mjing leh anăn mđĭ kyar dhar kreh Việt Nam mrâo mrang, bŏ hŏng knhuah gru djuê ana.

Y-Ƀel pô mblang