VOV4.Êđê- Hruê anei 19/8, ti Hà Nội, Phŭn bruă lŏ hma leh anăn mđĭ kyar krĭng ƀuôn sang bi mguôp hŏng Phŭn bruă klei mrâo leh anăn hâo hưn mkŏ mjing Knăm mtrŭt mjhar “Mlih mrô bruă lŏ hma leh anăn mđĭ kyar krĭng ƀuôn sang”, ba mdah kdrăp hâo hưn leh anăn klei čih pioh, kriê dlăng mrô krĭng pla mjing. Hluê si klei tĭng mkă, ară anei, kluôm ala mâo 4,8 êklăk ha pla mjing mâo dŭm mta msĕ si: ana ƀơ̆ng boh, mdiê lŏ leh anăn ana pla mjing sui thŭn. Hlăm anăn, lu anôk dưi mkăp brei mrô krĭng pla mjing čiăng ksiêm dlăng boh sĭt klei pla mjing, tui duah phŭn agha, mđĭ hnơ̆ng tŭ jăk boh mnga bruă lŏ hma msĕ si: briah mdiê krĭng dap mnai krông Cửu Long, kphê, kruê̆ hruê̆ krĭng Lăn Dăp Kngư, boh guga ti Bình Thuận, boh êrang, boh vải ti dŭm čar Hải Dương, Bắc Giang, Hưng Yên, Sơn La…. Ƀiădah hlăm klei ksiêm dlăng, hnơ̆ng klei pla mjing ăt dôk hliê, điêt, ka mkŏ kluôm ênŭm klei hưn plah wah bruă mkra mjing hŏng anôk mnia mblei. Klă sĭt čiăng mtrŭt mđĭ bruă mlih mrô hlăm bruă pla mjing srăng mđĭ boh tŭ dưn plah wah mkra mjing, anôk mnia mblei leh anăn phung blei ba yua.

                                                    Pô mblang: H’Nêč Êñuôl