Knăm Vesak (bi hdơr hruê kkiêng, jing yơng) mơ̆ng Yơng Thích Ca Mâu Ni dưi dlăng jing bruă dhar kreh klei đăo kyua klei êđăp ênang leh anăn dưi tŭ yap ti êpul gơ̆ng prŏng Êpul hgŭm lu ala čar hưl 54 hruê 15/12/1999.

Mơ̆ng thŭn 2000 truh kơ ară anei, Knăm Vesak Êpul hgŭm lu ala čar  dưi mkŏ mjing 19 blư̆, hlăm anăn Việt Nam jing anôk mkŏ mjing mâo 3 blư̆: thŭn 2008 ti anôk bi kƀĭn ala čar Mỹ Đình, Hà Nội, thŭn 2014 ti sang yơng Bái Đình, čar Ninh Bình leh anăn thŭn 2019 ti sang yơng Tam Chúc, čar Hà Nam.

Hŏng dŭm klei tŭ jing anăn, Việt Nam dưi ruah jing anôk mkŏ mjing Knăm Vesak Êpul hgŭm lu ala čar tal 20 thŭn 2025 ti anôk bruă yơng Việt Nam, kdriêk Bình Chánh, ƀuôn prŏng Hồ Chí Minh.

Jing pô lu blư̆ hriê hgŭm ti Việt Nam, Hoà thượng Tiến sĩ Tampalawela Dhammaratana – k’iăng khua êpul dhar bruă tar rŏng lăn Knăm Vesak Êpul hgŭm lu ala čar  (ICDV) bi êdah klei jăk ti anăp dŭm klei gĭr mơ̆ng Việt Nam hlăm bruă bi êdah mnơ̆ng kriê pioh djuê ana leh anăn đăo Yơng.

Knăm Vesak Êpul hgŭm lu ala čar   2025 jing yuôm bhăn amâo djŏ knŏng jing gưl tal 4 Việt Nam mkŏ mjing ƀiadah jing 50 thŭn êngiê hluh hlir lăn čar. Êngao kơ klei sa ai jăk mơ̆ng knŭk kna Việt Nam lŏ mâo klei gĭt gai mơ̆ng Knơ̆ng klei đăo yơng Việt Nam, ba anăp jing Pháp chủ Thích Trí Quảng. Anei jing sa gru hmô êdei êdi klei đăo yơng tar rŏng lăn dưi ksiêm dlăng leh anăn hluê hriăm. Kâo ƀuh jing bruă dhar kreh leh anăn lu bruă mkăn êlâo, hlăm leh anăn êdei knăm mkŏ mjing klei iêo jak mnuih ƀuôn sang nao hgŭm”.

Nao hlăm Knăm Vesak Êpul hgŭm lu ala čar 2025 ti ƀuôn prŏng Hồ Chí Minh thŭn anei mâo 1300 čô bi ala tar rŏng lăn jing phung kiă klei đăo yơng tar rŏng lăn, phung ksiêm duah, phung hriăm lu…mơ̆ng 85 ala čar leh anăn krĭng wăl. Klei anei amâo djŏ knŏng brei ƀuh kơhưm mơ̆ng Việt Nam leh anăn lŏ bi klă kơhưm mơ̆ng klei đăo yơng Việt Nam hlăm êpul đăo yơng tar rŏng lăn.

Knăm Vesak Êpul hgŭm lu ala čar tal 20 thŭn 2025 mâo akŏ jing Bi mguôp leh anăn thâo pap kyua knuih kniêng anak mnuih: klei thâo ƀuh yơng kyua klei êđăp ênang tar rŏng lăn leh anăn đĭ kyar hơĭt kjăp. Mkŏ mjing hŏng lu mta bruă msĕ si knăm mphŭn pŏk, dŭm gưl kƀĭn tar rŏng lăn, knăm pŭ yơng, hdră kdŏ mmuñ tŭ drông, klei kƀĭn trông leh anăn klei mjĕ mjuk dhar kreh klei đăo…

Blŭ hrăm hlăm knăm, bi ala khua gĭt gai Đảng, knŭk kna Việt Nam, Khua lăn čar Lương Cường lač klă dŭm boh tŭ phŭn mơ̆ng klei hriăm thâo pap – klei mĭn mâo yơng mtô ăt dôk kluôm boh tŭ dưn hŏng anak mnuih ară anei. Dŭm boh tŭ msĕ hŏng klei khăp kơ lăn čar, ai tiê thâo pap, mđing kơ klei jăk mơ̆ng đăo yơng mŭt hlăm ai tiê mnuih Việt Nam leh anăn đru ksul mbŭ dhar kreh djuê ana Việt Nam. Khua lăn čar Lương Cường brei thâo:

“Đảng, knŭk kna Việt Nam bi myuôm leh anăn mkŏ mjing klei găl čiăng kơ dŭm klei đăo, hlăm anăn mâo Yơng ngă bruă hlăm hdră bhiăn lăn čar, ngă sa anăn hdră êlan mpŭ leh anăn rơ̆ng kơ klei dưi êngiê klei đăo mơ̆ng grăp čô leh anăn dlăng anăn jing tur knơ̆ng yuôm bhăn čiăng mkŏ mjing klei bi mguôp djuê ana. Phung tăng ni, phung đăo yơng Việt Nam dưi, dôk leh anăn srăng lŏ hrăm mbĭt hŏng phung tăng ni, phung đăo yơng tar rŏng lăn đru kơ klei đăo leh anăn anak mnuih, kyua mta kñăm mbĭt jing klei êđăp ênang, bi hgŭm, bi mguôp leh anăn đĭ kyar”.

Knăm Vesak Êpul hgŭm lu ala čar 2025 ti ƀuôn prŏng Hồ Chí Minh jing 1 mta kñăm đru kơ Việt Nam đru mguop lu hĭn hlăm mta kñăm mơ̆ng Êpul hgŭm lu ala čar kyua klei êđăp ênang leh anăn đĭ kyar hơĭt kjăp./.