Êlan dơ̆ng prŏng čar mrô 1 Dak Nông, kdrêč nao găn alŭ 3, să Quảng Tâm, kdriêk Tuy Đức, mâo lu ƀăng ƀlŭng điêt prŏng, đa truh dŭm met, êgao pông êdeh. Ti lu kdrêč êlan, bêtông kpŏk jih, klŏ boh tâo kdloh ti ƀô̆ êlan. Grăp blư̆ êdeh êdâo găn êrô, ƀruih ƀhŭl mtŭk mtŭl, mnuih ƀuôn sang găn kreh ư̆ êwa. Trương Anh Bằng, sa čô čhĭ mnơ̆ng ƀơ̆ng ti Quảng Tâm brei thâo, êlan jhat rai lu thŭn hŏng anei. Khădah grăp thŭn dưi mkra mđĭ nanao, ƀiădah knŏng sa wưng bhiâo ăt lŏ jhat rai mơh.

"Sang kâo čhĭ mnơ̆ng tinei kreh kđăl nanao ală kĭng huĭdah ƀhŭl jih mnơ̆ng dhơ̆ng. Jhưng mdhô̆ kreh sut mơ̆ng 2 – 3 blư̆ hlăm grăp hruê ƀiădah kăn dưi doh mơh. Lu phung amĭ ama mdiăng čô anak găn êlan anei gơ̆ ƀhŭl mtŭk mtŭl jih čhum ao. Phung hđeh đa đĭ êdeh lĕ buh gơ̆ čhŏ jih yơh, kâo kreh dưm sô êa ti tač kơ hđeh sang hră, amĭ ama rao jơ̆ng kngan. Diñu ăt mkra mơh êlan ƀiădah sui tinăn ăt jhat, ƀhŭl mtŭk mtŭl snei mơh.

Êlan dơ̆ng prŏng čar mrô 1 Dak Nông jhat rai amâo djŏ knŏng hmăi truh kơ bruă mnia mblei lehanăn klei hdĭp aguah tlam mơ̆ng mnuih ƀuôn sang ƀiădah lŏ ngă jhat rai êdeh êdâo, hruê mmông dŭ mdiăng mnơ̆ng sui hĭn lehanăn ngă luič liê lu êa săng, êa pui hĭn, ngă mđĭ ênoh bi liê. Nguyễn Kim Toàn, sa čô mgăt êdeh đăo tĭng:

 “Kâo nao mơ̆ng Quảng Tân truh ti Dak R’Tih amâo dah dŭm să mkăn hlăm lam ară anei kreh sui hĭn mơ̆ng 2 – 3 blư̆ mkă hŏng êlâo adih. Bi êlâo knŏng 3 – 4 lit êa pui snăn ară anei liê truh kơ 9 – 10 lit. Êlâo adih, êlan jăk, mlih pông 1,5 thŭn/blư̆, ară anei 7-8 mlan mlih sa blư̆.

Êlan dơ̆ng prŏng čar mrô 1 Dak Nông jing ktuê êlan phŭn, mkŏ kdriêk Tuy Đức hŏng kdriêk Dak R’lâp, mkŏ êlan Hồ Chí Minh lehanăn Êlan dơ̆ng prŏng mrô 14C, nao mơ̆ng ƀăng jang knông lăn Bu Prăng truh ti Campuchia, mâo bruă klam yuôm bhăn hlăm klei dŭ mdiăng mnơ̆ng, mtrŭt mđĭ kyar bruă duh mkra – ala ƀuôn lehanăn rơ̆ng kjăp klei êđăp ênang bruă lĭng kahan, klei êđăp ênang ala ƀuôn ti krĭng knông lăn Tuy Đức. Mta phŭn ngă jhat rai ktuê êlan anei jing kyua êdeh mdiăng mnơ̆ng p’prŏng găn êrô lu, êdeh mdiăng tuê đĭ hlăm wưng êgao, hlăk hdră mkra mđĭ hlăm grăp thŭn dôk êdu kƀah.

Dương Huy Toàn, Khua bruă Đảng kdriêk Tuy Đức brei thâo, kdriêk ba mơĭt leh kơ Anôk bruă sang čư̆ êa čar Dak Nông lehanăn Phŭn bruă Rŭ mdơ̆ng mkăp prăk đru mkra mđĭ êlan anei. Ară anei, hdră ba mdah mâo bi mklă leh, dôk guôn klei msir mghaih dŭm bruă adôk.

“Čar ksiêm dlăng leh bruă mkra mlih dŭm phŭn mkăp prăk mơ̆ng Gưl dlông čiăng pŏk ngă bruă mkra mđĭ êlan anei. Klei kơ hdră mtrŭn lehanăn prăk duh bi liê, klei ngă hră mơar dôk pŏk ngă čiăng dưi mkra mđĭ ktuê êlan anei hlăm knhal jih thŭn anei mtam”.