Nguyễn An Vinh, Khua dlăng bruă Đảng hđăp čar Dak Lak, pô mâo leh êbeh 50 thŭn mă bruă ti alŭ wăl bi mklă, hdră êlan bi mŭt dua čar jing sa knhuang nao djŏ guôp hŏng boh sĭt leh anăn klei mnuih ƀuôn sang čang hmăng:

"Kâo ƀuh anei jing bruă ngă djŏ guôp hŏng mnuih ƀuôn sang dua čar. Phung knuă druh tuôm mă bruă hlăm ênuk bi blah msĕ kâo thâo săng klă klei bi hgŭm kjăp, klei khăp plah wah Dak Lak leh anăn Phú Yên. Hlăm klei bi blah hŏng Mi, Phú Yên jing leh čar đru nah tluôn mkăp mnơ̆ng ƀơ̆ng huă, hra, braih leh anăn mnơ̆ng yua aguah tlam kơ Dak Lak. Bi Dak Lak ăt jing anôk knang mơ̆ng Phú Yên mơ̆ng krĭng čư̆ čhiăng. Klei bi mguôp anăn êlam tơl mnuih ƀuôn sang tuôm duê “Krông Pa đoh ti Đà Rằng/ Hlei pô khăp čiăng Dak Lak msĕ si Phú Yên”.

Hlăm klei bi hdơr mơ̆ng phung kahan tuôm djiê hdĭp kyua klei êngiê djuê ana, klei bi hgŭm plah wah dua alŭ wăl amâo djŏ jing klei bi đru hlăm lăn ala êa jua ôh, ƀiădah lŏ jing klei khăp bi mguôp, bi đru. Bùi Văn Khiêm, kahan hđăp tuôm nao bi blah mtlaih êngiê Phú Yên thŭn 1975, ară anei dôk hdĭp mda ti Dak Lak, amâo dưi mdăp ôh klei mgei ai tiê brei thâo:

 “Kâo tuôm lač hŏng ayŏng adei kâo čang hmăng Dak Lak srăng bi mŭt hŏng Phú Yên. Klă sĭt klei anăn jing sĭt. Kâo hdơr ênuk bi blah, mơ̆ng Ƀuôn Ama Thuôt kâo nao ti Phú Yên, nao hlăm dliê leh anăn hlăm êa ksĭ, leh anăn kâo čang hmăng mgi dih êlan dơ̆ng êran pral ktuê krông Pa hriê ti Dak Lak bi leh, snăn klei khăp yuôm bhăn snăk. Ară anei drei bi mŭt dua ala čar Dak Lak hŏng Phú Yên snăn mơak snăk , jing klei kâo čiăng jing sĭt.”

Sa čô ƀuh klei hƀuê ênuk mkăn, Tô Tấn Tài, lŏ iêô jing Ama H’Oanh,  Khua dlăng bruă Đảng wăl krah Ƀuôn Ama Thuôt - amĭ kkiêng ti Phú Yên, ƀiădah pioh leh jih klei hdĭp pô kơ bruă krŭ kdơ̆ng ti Dak Lak. Ñu tuôm ngă leh lu bruă yuôm bhăn êdei anei lăn čar hluh lir leh anăn jing sa hlăm phung knuă druh dưm tur knơ̆ng kơ hdră krŭ kdơ̆ng ti krĭng wăl Lăk mơ̆ng thŭn 1959. Kah mbha kơ ai tiê  kơ klei srăng bi mŭt dua čar, ñu bi êdah klei mơak ƀiădah ăt kăn wơr brei mtă dlăng myuôm kơ klei bi hgŭm hlăm lam, êpul:

 “Rŭng răng si ngă čiăng kơ êpul mă bruă hlăm lam jăk, mnuih ƀuôn sang thâo săng, bi hgŭm. Kyua pô ăt rŭng răng, êlâo dih drei ăt mâo leh mơh wưng bi ktlah dŭm čar Bình Trị Thiên, leh anăn Quảng Nam, Đà Nẵng, Phú Yên Khánh Hòa. Ƀiădah hlăk anăn năng ai jing klei găl ka kjăp ôh, tal dua jing bruă mprăp klei mĭn kơ mnuih ƀuôn sang ka jăk anăn mâo boh klei dŭm čar bi mŭt snăn mâo klei dleh dlan amâo thâo bi djŏ mơ̆. Ară anei đăo knang hlăm boh klei mrâo hŏng klei mĭn mơ̆ng Đảng gĭt gai kjăp, ngă jăk klei mĭn hlăm lam mơ̆ng anăn lar bra hlăm mnuih ƀuôn sang snăn ƀuh ăt jăk mơh.”

 Niê Thanh Mai,  Khua Êpul hgŭm čih, kač rup čar Dak Lak, mâo ama jing mnuih Phú Yên, amĭ mnuih Dak Lak - mâo klei thâo săng êlam kơ dhar kreh. Niê Thanh Mai brei thâo, Phú Yên mâo dhar kreh êa ksĭ, Dak Lak jiă kma knhuah dŭm djuê ƀiă Lăn Dap Kngư. Tơdah thâo ba yua, anei srăng jing sa tur knơ̆ng dhar kreh lu jơr, mjing klei găl kơ bruă čih, kač rup, mđĭ kyar hiu čhưn ênguê leh anăn mjĕ êrô dhar kreh:

 “Hmei čang hmăng snăk leh anăn hmăng hmưi hmei srăng bi đru hdơ̆ng pô leh anăn bi kah mbha klei thâo ăt msĕ mơh mâo lu hĭn klei čih mkra kơ 2 mta bruă. Tơdah mâo hdră kčah leh anăn bruă ngă klă klơ̆ng snăn dŭm bruă ngă srăng lu snăk leh anăn lu jơr hlăm wưng kơ anăp.”

Mnuih ƀuôn sang ăt bi êdah klei sa ai. Nguyễn Song Thoại, alŭ 8, wăl krah Quảng Phú, kdriêk Čư̆ Mgar, čar Dak Lak lač: “Ară anei Dak Lak bi mŭt hŏng Phú Yên jing djŏ guôp, mâo čư̆, mâo êa ksĭ. Ƀiădah ñu dleh kơ dhar kreh đuč bi bruă duh mkra jăk sơăi.”

Klei bi mŭtt plah wah Dak Lak leh anăn Phú Yên amâo djŏ knŏng bi mklă hră mơar ôh, ƀiădah lŏ jing klei lŏ mkŏ klei bi mguôp mâo leh hlăm hƀuê ênuk bi blah. Hŏng tur knơ̆ng lăn ala, čư̆ čhiăng bi đru, dhar kreh lu jơr leh anăn hƀuê ênuk bi mguôp, čar Dak Lak mrâo čang hmăng srăng jing sa anôk đĭ kyar mrâo ti krĭng Dhŭng kwar Krah leh anăn Lăn Dap Kngư. Êngao anăn, msĕ si klei blŭ lač leh, klei phŭn jing klei sa ai hlăm êpul knuă druh gĭt gai leh anăn klei mnuih ƀuôn sang sa ai. Knŏng snăn kơh, klei bi mŭt klă sĭt dưi mđĭ lar klei ktang bi mguôp, mjing sa anôk mđĭ kyar mrâo, jăk leh anăn kjăp.