Klei bi kƀĭn dưi mkŏ mjing leh mâo lu klei mgei lăn dleh dưi ksiêm dlăng ti alŭ wăl čar. Čih yap mơ̆ng Knơ̆ng ksiêm dlăng lăn ala, mơ̆ng hruê 4/4/2021 mphŭn mâo dŭm klei mgei lăn ti Kon Tum, hŏng msăt anôk mgei lăn lu ti kdriêk Kon Plŏng. Tĭng truh kơ knhal jih mlan 4/2025 ti krĭng anei mâo leh êbeh 1.000 klei mgei lăn hŏng hnơ̆ng huĭ hyưt mơ̆ng gưl 0 truh kơ gưl 1.

Hluê si klei tĭng dlăng mơ̆ng phung mă bruă kreh knhâo, klei mgei lăn mâo ti alŭ wăl kdriêk Kon Plŏng, čar Kon Tum, tal êlâo mâo ktang, ƀrư̆ ƀrư̆ hnơ̆ng dj’djĕ hĭn lehanăn hrŏ hluê hruê mlan. Ti anăp klei anei, mbĭt hŏng bruă mkŏ dăp 11 anôk bruă kăp ksiêm dlăng ti Kon Tum, mơ̆ng mlan 3/2024 Knơ̆ng ksiêm dlăng lăn ala hluê ngă leh Hdră tui ksiêm kreh knhâo “Tĭng dlăng klei mgei lăn lehanăn ba mdah dŭm hdră msir mdrơ̆ng djŏ guôp kơ čar Kon Tum lehanăn dŭm krĭng djiêu gah”. Mta kñăm truh kơ mlan 2/2027 leh mjưh ruê̆ hdră tui ksiêm anei srăng dưi bi mklă mta phŭn ngă klei mgei lăn ti kdriêk Kon Plŏng, čar Kon Tum, tĭng dlăng klei huĭ hyưt mơ̆ng klei mgei lăn hŏng êpul êya alŭ wăl lehanăn mkŏ mjing dŭm hdră kñăm mdrơ̆ng hŏng klei mgei lăn ti Kon Plŏng ăt msĕ mơh dŭm krĭng djiêu gah./.