Trần Quang Bình jing pô sa knơ̆ng bruă mkŏ mkra ti Dak Lak, mâo 5 bruă mkŏ mkra dôk ngă bruă jih jang lĕ hlăm klei êmưt kyua kƀah lăn. Khădah iêo jih leh dŭm anôk kral ƀiădah kăn dưi bi hơĭt boh klei. Ñu rŭng răng êdi kyua knơ̆ng bruă pô dôk tlă anăp hŏng klei pô duh bi liê đŭ bi kmhal kyua ngă bruă êmưt:

Anôk bruă dôk ngă dŭm hdră bruă mkŏ mkra ti Dak Lak leh anăn Dak Nông. Êlâo dih, grăp blư̆ iêo pô mă čuah srăng tuh hlăm hruê leh anăn ênoh hlăm brô 300 êbâo prăk hlăm m3. Dŭm hruê hŏng anei, blŭ hrăm hŏn anôk čhĭ čuah ênoh đĭ leh 70 – 80%, ƀiădah kăn mâo čuah blei lei. Ênoh čuah đĭ yuôm êngao kơ hmăi kơ ênoh prăk mĭn tĭng ngă bruă, ƀiădah lŏ hmăi kơ klei mă bruă. Tơdah êmưt pô duh bi liê srăng đŭ bi kmhal, kyuanăn mñă kơ dŭm knơ̆ng, dhar bruă, anôk bruă uêñ mĭn kơ boh klei anei.”

Ăt msĕ hŏng Trần Quang Bình jing klei ênoh čuah đĭ yuôm hlăm lu anôk. Ksiêm dlăng ti ƀuôn prŏng Ƀuôn Ama Thuôt, dŭm kdriêk Čư̆ Mgar, Krông Ƀŭk, Ea Hleo, wăl krah Ƀuôn Hồ brei ƀuh ênoh čuah đĭ yuôm hlăm brô 70 – 80%, đa đa anôk đĭ 2 blư̆ mkă hŏng 1 mlan êlâo. Amai Tạ Bích Trâm, pô sa anôk bruă čhĭ mnơ̆ng mkŏ mkra ti ƀuôn hgŭm Tân Lợi, ƀuôn prŏng Ƀuôn Ama Thuôt brei thâo, hlăm brô 1 mlan êlâo, čuah knŏng ti gŭ 300 êbâo prăk 1 m3, ară anei truh leh 500 êbâo mrăk hlăm 1 m3. Khădah ênoh čuah đĭ yuôm ka tuôm mâo ƀiă lu sang čhĭ mnia ăt kƀah čuah, amâo mâo čuah čhĭ.

“Ară anei iêo blei čuah ƀrư̆ hruê ƀrư̆ dleh dlan wăt hŏng sang čhĭ mnia, ka lač ôh hŏng mnuih ƀuôn sang. sa mlan êlâo kâo iêo hlăm brô 300 êbâo prăk 1 m3, ƀiădah ară anei êbeh 500 êbâo prăk 1 m3. Ênoh yuôm sơnăn dleh kơ hmei leh anăn pô čiăng mkra sang. Wăt kơ ênoh yuôm ƀiăda iêo kăn lŏ mâo čuah lei. Amâo mâo čuah wăt kơ msei, boh tâo, simăng kăn thâo čhĭ lei, kyua amâo mâo mnơ̆ng lŭk simăng. Phung čhĭ ară anei dôk sa anôk yơh”.

Bi kơ boh klei anei, sa čô khua gĭt gai Knơ̆ng bruă lŏ hma leh anăn wăl hdĭp mda čar Dak Lak brei thâo, phŭn agha klei anei kyua êa ti dŭm hnoh krông trŭn, lu kŭm păn amâodưi mă čuah msĕ yăng đar. Êngao kơnăn, lu kŭm păn jih wưng ngă bruă, dôk guôn ngă hră mơar ksiêm dlăng čiăng mâo djăp klei găl bi êran hluê si hdră bhiăn lăn čar. Čiăng mgaih msir, knơ̆ng bruă mñă leh kơ dŭm anôk bruă ênŭm hră mơar mtrŭt bi pral klei mă čuah, mbĭt anăn rơ̆ng djŏ hŏng hdră bhiăn čiăng bi mâo djăp klei čiăng anôk mnia mblei. Ƀiădah klei êa krông hrŏ dleh mă čuah grăp thŭn mâo nanao ti Dak Lak, dŭm kŭm păn jih hruê ăt kăn sa blư̆ lei, kyuanăn klei ênoh čuah đĭ yuôm ti Dak Lak ăt mâo phŭn agha mkăn.

Trung tá Nguyễn Đức Duy – K’iăng khua adŭ bruă kahan ksiêm bruă duh mkra, kahan ksiêm čar Dak Lak brei thâo, hruê 5/5, Phŭn bruă kahan ksiêm mâo leh klei gĭt gai dŭm anôk bruă kahan ksiêm dŭm čar ksiêm dlăng kluôm bruă mă čuah, dŭ mdiăng leh anăn ba čhĭ čuah. Adŭ bruă kahan ksiêm bruă duh mkra dôk bi mguôp hŏng adŭ bruă kahan ksiêm êlan klông leh anăn kahan ksiêm alŭ wăl ngă klei trŭn kơ bruă ksiêm dlăng jih jang 21 knơ̆ng bruă mă čuah, boh tâo ti alŭ wăl čar. Ƀiădah kta kñăm ksiêm dlăng jing mkŏ wĭt hdră bhiăn hlăm klei mă čuah, dŭ mdiăng leh anăn ba čhĭ čuah. Phung ktuê dlăng lač, bruă ksiêm dlăng mơ̆ng kahan ksiêm ngă kơ knơ̆ng bruă mdei hĕ klei ngă bruă ngă tuh klei kƀah leh anăn ênoh đĭ yuôm.

Bruă ksiêm dlăng anei jing čiăng mkŏ wĭt hdră bhiăn hrui mă, čhĭ mnia. Knơ̆ng bruă ăt dưi mă čuah, čhĭ mnia hluê si hdră bhiăn lăn čar. Tơdah hlăm ksiêm dlăng kluôm, hmei hmao ƀuh knơ̆ng bruă amâodah êpul bruă, grăp čô mâo klei mdăp, mkăm pioh, ngă klei kƀah hlăm anôk mnia mblei, mâo klei ngă soh hŏng hdră bhiăn lăn čar, hmei srăng ƀuah mkra ktang phĭt, ñĕ kơ klei đĭ ênoh loar".

Klei kƀah čuah dôk ngă klei hmăi kjham kơ dŭm bruă mkŏ mkra ti Dak Lak, trŭt knơ̆ng bruă leh anăn mnuih ƀuôn sang lĕ hlăm klei dleh. Ênoh čuah đĭ yuôm amâo djŏ knŏng hmăi kơ ênoh ênil, ƀiădah lŏ ngă klei êmưt hlăm bruă mkŏ mra, ngă kơ lu sang čhĭ mnia lĕ hlăm klei amâo mâo hơĭt. Khădah dhar bruă djŏ tuôm ngă leh bruă čiăng ƀư̆ mkra klei mă čuăh, dŭ mdiăng leh anăn ba čhĭ čuah, ƀiădah klă sĭt, čiăng mâo hdră êlan kluôm leh anăn sui čiăng rơ̆ng kơ klei mkăp brei hơĭt kjăp, ñĕ kơ klei êpa čuah lŏ wĭt mâo. Hlăm wưng bruă mkŏ mkra ƀrư̆ hruê ƀrư̆ đĭ, bruă kiă kriê, ksiêm dlăng anôk mnia mblei mnơ̆ng mkŏ mkra hŏng klei klă mngač, tŭ dưn jing klei čiăng êdi, čiăng bi kna plah wah boh tŭ knŭk kna, knơ̆ng bruă leh anăn mnuih ƀuôn sang.