VOV4.Êđê- Ti anăp yan adiê mđiă hlơr, klei ba yua pui kmlă đĭ ktang hlăm dŭm čar krĭng kwar dhŭng, knơ̆ng bruă pui kmlă krĭng kwar Dhŭng dôk mkŏ mjing hdră êlan rơ̆ng klei mkăp brei pui kmlă hlăm wưng mđiă hlơr ktang leh anăn klei ba yua pui kmlă đĭ ktang. Hluê si knơ̆ng bruă pui kmlă krĭng kwar Dhŭng, hlăm mlan 2 thŭn 2022, 21 čar, ƀuôn prŏng krĭng kwar Dhŭng mơ̆ng Ninh Thuận truh kơ Cà Mau, êngao mă ƀuôn prŏng Hồ Chí Minh mâo hnơ̆ng ba yua pui kmlă jing 5,461 êklai kWh, đĭ 17% mkă hŏng mlan 2/2021. Đăo knăl hlăm mlan 3 anei, mđiă hlơr, hnơ̆ng h’uh hlăm kluôm alŭ wăl lŏ dơ̆ng đĭ ktang, dŭm alŭ wăl krĭng dhŭng lŏ wĭt hlăm klei ngă bruă msĕ yăng đar hlăm djăp mta bruă kyuanăn klei ba yua pui kmlă đĭ lu. Mbĭt hŏng bruă rơ̆ng klei mkăp brei pui kmlă, knơ̆ng bruă pui kmlă krĭng kwar Dhŭng mtă kơ dŭm knơ̆ng bruă, mnuih ƀuôn sang srăng yua pui kmlă djŏ guôp, mâo boh tŭ dưn, ksiêm dlăng nanao kdrăp yua pui kmlă hlăm gŏ sang, sang măi, sang mkra mjing.

Pô mblang: Y-Khem Niê