Êpul nao ksiêm dlăng leh krĭng mplĕ hră mrô 38, ƀuôn hgŭm Ƀuôn Ama Thuôt kơ bruă mprăp kdrăp mnơ̆ng, bruă ksiêm dlăng anăn phung bi ala kơ mnuih ƀuôn sang, anăn phung mgơ̆ng ruah,  mkŏ mjing klei hriăm kơ hdră ruah khua. Hlue si klei hưn mdah, krĭng mplĕ hră mrô 38 mâo êbeh 3.110 čô bi ala hlăm alŭ 5 leh anăn alŭ 8 nao hgŭm ruah khua. Truh wưng anei, dŭm hdră mprăp kơ klei ruah khua klă klơ̆ng dưi pŏk ngă djăp ênŭm, djŏ hdră kčah; mnơ̆ng dhơ̆ng pioh kơ bruă ruah khua dưi mprăp jăk.

 Hlăm klei bi kƀĭn hŏng phung hlăm Knơ̆ng bruă ruah khua čar, Cao Thị Hòa An, Khua hlăm bruă Đảng gưl dlông, K’iăng khua bruă Đảng čar, Khua Êpul gơ̆ng bruă ƀuôn sang čar, Khua Knơ̆ng bruă ruah khua čar Dak Lak mtă lŏ dơ̆ng ksiêm dlăng, bi mklă anăn phung bi ala kơ mnuih ƀuôn sang; mđĭ ktang bruă hâo hưn hŏng lu hdră čiăng mjing ai êwa hơ̆k mơak hlăm yang ƀuôn.