VOV4.Êđê -  “Ksiêm wĭt jih jang bruă klam mơ̆ng mnuih djă akŏ djăp êpul êya bruă, tơdah adôk mâo dŭm bruă ngă jing êmưt hlăm klei duh bi liê kluôm”, anei jing klei Khua knơ̆ng bruă sang čư̆ êa čar Daklak bi klă ti anôk bi kƀĭn Knơ̆ng bruă sang čư̆ êa čar kơ tuôr mlan 8, mkŏ mjing hrue mbrue (13/9), leh ksiêm wĭt hdră mđĭ kyar bruă duh mkra ala ƀuôn, bruă răng mgang klei êđăp ênang mlan 8 lehanăn hlue ngă bruă knuă mlan 9 lehanăn hlăm dŭm mlan knhal jih thŭn. Kơ hdră duh bi liê kluôm thŭn 2022, čar Daklak bi liê leh kơ dŭm mta bruă điêt lehanăn prŏng hŏng ênoh êbeh 3 êbâo 600 êklai prăk.

Truh kơ ară anei mâo bi liê leh êbeh 913 êklai prăk, djăp 26% hdră kčah. Jing ƀiă hĭn mkă hŏng ngăn prăk kluôm hlăm kluôm ala jing êbeh 34%. Leh hlak mblang jih jang boh phŭn kơ klei ngă bruă adôk êmưt, knơ̆ng bruă sang čư̆ êa čar Daklak mtă leh năng mkŏ mjing truh kơ 4 êpul ngă bruă hŏng phung duh bi liê čiăng ksiêm dlăng mtrŭt mjhar, ruh mgaih jih jang klei dleh dlan, mtă kơ pô djă akŏ dŭm knơ̆ng dhar bruă mâo klei đua klam tơdah lŏ lui djăp mta bruă duh bi liê hŏng klei êmưt./.

Y-Khem pô mblang