VOV4.Êđê - Djŏ tuôm kơ hdră knơ̆ng kdơ̆ng êa Akŏ Krông Pač 4.400 êklai prăk êmưt hluê ngă, hruê 21/3, êpul mă bruă mơ̆ng Phŭn bruă Lŏ hma mđĭ kyar krĭng ƀuôn sang nao ksiêm dlăng lehanăn brei pral bi leh hdră mkŏ anôk dôk mrâo kyua huĭ klei êa lip, êngăp êa bluh mâo msĕ thŭn êlâo. Êpul mă bruă nao ksiêm dlăng leh ti akŏ hdră knơ̆ng kdơ̆ng êa akŏ Krông Pač lehanăn 2 krĭng mkŏ anôk dôk mrâo mrô 1 lehanăn mrô 2 mơ̆ng hdră anei.

Hluê si klei hưn mơ̆ng Anôk kriê dlăng hdră knơ̆ng kdơ̆ng êa mrô 8, truh ară anei, hdră anei dưi hluê ngă leh 80% lehanăn dưi bi leh êbeh 40 km hlăm ênoh 60 km êlan mđoh êa. Hŏng hdră mkŏ anôk dôk mrâo, Phŭn bruă Lŏ hma mđĭ kyar krĭng ƀuôn sang mtă hlăm mlan 6 ti anăp, brei Dak Lak mbĕ jih jang mnuih ƀuôn sang mơ̆ng krĭng êngăp êa mơ̆ng hdră knơ̆ng kdơ̆ng êa Akŏ Krông Pač./.

H’Nêč pô mblang