VOV4.Êđê - “Êlâo dih drei knŏng mâo mlam leh anăn dliê”. Ară anei drei mâo hruê, mâo adiê, mâo êa ksĭ. Hang êa ksĭ drei taih, jăk siam, drei srăng thâo răng mgang ñu. Anăn jing klei mtă mtăn mơ̆ng khua gĭt gai Hồ Chí Minh êjai wĭt čuă êpul êya Kahan êa hlăk mlan 3/1961, mâo grăp čô lĭng kahan, kahan êa, knuă druh lĭng kahan Krĭng 4 Kahan êa hdơr nanao, jing mnơ̆ng ktrâo êlan kơ djăp bruă mă. Tui hriăm, hluê ngă asăp Awa hồ, grăp čô knuă druh, lĭng kahan krĭng 4 Kahan êa mâo leh lu klei bi hmô mrâo, klei ngă bruă mrâo hŏng klei mbruă, mâo boh tŭ dưn, bi lar ƀra, dưi dưn yua hlăm boh sĭt leh anăn ba wĭt boh tŭ dưn yuôm bhăn hlăm klei hluê ngă bruă klam mjuăt bi hriăm, mprăp klei bi blah, răng mgang klei dưi kiă kriê êa ksĭ, plao ksĭ ala čar.

Bi tuôm hŏng Trung úy Nguyễn Đình Lương, Khua kiă kriê kdrăp knong ti hô̆ pui, Adŭ bruă đru kčĕ, Lữ đoàn 162 hlăk ayŏng dôk hưn mthâo kơ phần mềm “Hdră kriê pioh ti gơ̆ng knong AK-176 hlăm hô̆ pui mrô 12418” kơ phung knuă druh lĭng kahan hlăm hô̆… Anei jing mta phần mềm mâo ayŏng ksiêm dlăng lehanăn dưi ba yua kơ hô̆ pui mâo kdrăp ƀrăm pui mnah hŏng klei pral 12418 mâo boh tŭ dưn. Ayŏng Lương brei thâo, kbiă hriê mơ̆ng boh sĭt hdră mă bruă hlăm hô̆ pui, thơ̆ng kơ anôk bruă knong AK176 jing dŭm mta knong mrâo mrang dưi mkŏ dưm ti lu hô̆ pui. Ƀuh bruă ksiêm dlăng ti hră m'ar hŏng dŭm mta phần mềm gru hmô, dưi ƀuh klă anăp kdrăp mnơ̆ng bi hmô hriăm srăng găl ênưih hĭn, mjing klei jăk lehanăn đru kơ phung kahan ênưih thâo săng, thâo ƀuh, hriăm jăk hĭn mơh. Kyua anăn, leh 3 mlan ksiêm hriăm, găn lu klei dleh dlan, ayŏng mjing leh phần mềm đru kơ phung kahan ênưih ksiêm hriăm lehanăn ba yua hlăm bruă dlăng kriê dŭm mta phao ktuang hlăm hô̆ pui, mkăp kơ bruă mjuăt bi hriăm lehanăn ngă khua êpul kiă kriê knong AK-176. Phần mềm mâo leh klei pah mni mta A mơ̆ng klei pah mni phung mda asei mâo klei mĭn mrâo Nguyễn Phan Vinh thŭn 2021 mơ̆ng Knơ̆ng gĭt gai kahan êa. Trung úy Nguyễn Đình Lương brei thâo:Kâo pô mâo nanao klei mĭn čiăng dưi ba yua dŭm kdrăp mrâo mrang snăn brei mâo klei mĭn mrâo, jhŏng mĭn, jhŏng ngă. Hlăm wưng ti anăp, kâo pô srăng krơ̆ng kjăp lehanăn mđĭ lar dŭm boh tŭ dưi mâo, sĭt êmĭt tui ksiêm, mđĭ klei thâo hlăm bruă kđi čar, klei thâo kơ djăp mta bruă, bi leh jih bruă klam mâo kčah jao. Mđĭ lar ai tiê ba anăp, hŏng klei mĭn mrâo mơ̆ng phung mda asei, lŏ dơ̆ng ksiêm hriăm kreh knhâo, hŏng klei mbruă, ba yua hdră mrâo hlăm bruă mjuăt bi hriăm đru mguôp mkŏ mkra Lữ đoàn 162 Cách mạng, knhâo, mrâo mrang djŏ hŏng bruă klam răng mgang kjăp klei dưi kiă kriê kluôm dhuôm krĭng êa ksĭ, plao ksĭ, krĭng lăn yuôm bhăn mơ̆ng ala čar hlăm boh klei mrâo.

Hluê ngă Asăp mtrŭn mrô 05 mơ̆ng Phŭn bruă kđi čar kơ “Mtrŭt mđĭ bruă tui hriăm lehanăn hluê ngă klei mĭn, knhuah hdĭp mngač Hồ Chí Minh” ti Kahan êa krĭng 4 mâo ƀuh leh lu gru mngač êdah êdi hŏng hdră mă bruă mrâo, ba wĭt klei tŭ dưn hlăm djăp mta bruă. Hŏng k’hưm jing pô đru bruă Anôk bruă phao ktuang lĭng kahan, Adŭ bruă kdrăp mnbơ̆ng yua, thượng úy Trần Công Tạo amâo mdei ksiêm hriăm, đru mguôp dŭm klei mĭn mrâo, mkra mđĭ kdrăp mnơ̆ng, đru mguôp hlăm bruă mđĭ boh tŭ dưn ba yua kdrăp phao ktuang mrâo mrang ti êpul bruă. Êdah êdi msĕ si gru hmô “Kdrăp đru mdar đĭng kliêng mnah ƀrăm pui hlăm gŭ êa mơ̆ng hô̆ pui Gepard 3.9”, klei anei dưi yap jing yuôm kơ boh tŭ dưn hlăm bruă pŏk ngă jing sĭt. Klei mĭn mrâo anei mâo mă leh klei pah mni mrô 1 mơ̆ng Klei bi lông “Phung mda asei hŏng klei mĭn mrâo kluôm lĭng kahan”. Thượng úy Trần Công Tạo brei thâo:Anei jing mta mnơ̆ng dưi mkra mjing mrâo hŏng mta kñăm đru kơ hdră ba yua gơ̆ng mnah hlăm hô̆ pui, đru mđĭ klei thâo ngă bruă mơ̆ng gơ̆ng mnah, đru kơ bruă mjuăt bi hriăm, kdơ̆ng mblah mbĭt anăn bi hrŏ klei ba yua ai ktang mơ̆ng phung kahan hlăm hdră ba yua kdrăp phao ktuang. Asei kâo pô ăt gĭr hriăm, mđĭ klei thâo kơ pô, tui ksiêm kơ kdrăp phao ktuang mrâo, kdrăp mrâo, mơ̆ng anăn mđĭ hdră hrŏng ruah, ksiêm hriăm, ba yua hlăm boh klei mâo sĭt, djŏ hŏng bruă klam ƀrư̆ hruê ƀrư̆ đĭ đru mguôp hlăm bruă răng mgang klei dưi kiă kriê kluôm dhuôm krĭng êa ksĭ, plao ksĭ hlăm boh klei mrâo.

Hŏng phung kahan dôk hluê ngă bruă klam ti plao ksĭ Trường Sa, kbưi hŏng lăn hang, hlăm anôk dôk lu klei dleh dlan, ƀiădah grăp čô knuă druh, lĭng kahan hdơr nanao kơ asăp Awa mtă. Trung tá Phạm Quốc Hùng, knuă druh ti plao ksĭ Sơn Ca, Lữ đoàn 146 brei thâo: Grăp čô knuă druh, lĭng kahan ti plao ksĭ tui hriăm lehanăn hluê ngă nanao gru mngač, knhuah hdĭp jăk Hồ Chí Minh ti dŭm bruă ngă klă klơ̆ng hlăm grăp hruê. Mơ̆ng bruă mkiêt mkriêm pui kmlă, truh kơ bruă pla djam, dlăng kriê mnơ̆ng pla ti lăn čuah lehanăn san hô amâo dah thâo klă čiăng ktrâo lač kơ mnuih ƀuôn sang hiu trah mă kan ngă bruă hŏng klei êđăp ênang. Hŏng bruă klam răng mgang êa ksĭ, plao ksĭ, grăp čô knuă druh, lĭng kahan thâo săng klă hlăm bruă mjuăt bi hriăm, hluê ngă kjăp klei bhiăn, thâo săng hdră mă bruă ti êpul êya, lač hlŏng ngă mtam. Trung tá Phạm Quốc Hùng mñă klă:Hluê ngă asăp Awa mtă, hlăm wưng êgao, kâo pô mbĭt hŏng phung knuă druh, lĭng kahan hlăm êpul sĭt êmĭt tui hriăm, mđĭ klei thâo hlăm bruă kđi čar, thâo klă ƀĭng hgŭm bruă lehanăn dŭm klei mĭn, klei bhiăn mơ̆ng Đảng, knŭk kna drei hlăm klei hluê ngă bruă klam kdơ̆ng mblah, răng mgang kluôm krĭng êa ksĭ, plao ksĭ. Gĭr mjuăt hriăm, thâo ba yua dŭm mta phao ktuang, mprăp kdrăp mnơ̆ng, mđĭ klei răng, msir mghaih jih klei tăm mâo, amâo lui kdjăt kƀla hlăm djăp boh klei mâo.

Hluê si khua kahan Ngô Văn Thuân, Khua hlăm anôk bruă Đảng kahan êa krĭng 4, Hluê ngă Asăp mtrŭn mrô 05 mơ̆ng Phŭn bruă kđi čar kơ “Mtrŭt mđĭ bruă tui hriăm lehanăn hluê ngă klei mĭn, knhuah mngač Hồ Chí Minh”, dŭm thŭn êgao, kahan êa krĭng 4 dưi mâo leh dŭm boh tŭ dưn klă sĭt. Lu klei mĭn mrâo dưi ba yua hlăm boh klei sĭt ba wĭt klei tŭ dưn hlăm bruă mjuăt bi hriăm, mprăp kdơ̆ng mblah, răng mgang kluôm krĭng êa ksĭ, plao ksĭ yuôm bhăn mơ̆ng ala čar.Dưi bi mklă hlăm wưng êgao, bruă tui hriăm knhuah mngač Hồ Chí Minh mơ̆ng kahan êa krĭng 4 mâo leh ai lar bra, jak iêu lu phung knuă druh, lĭng kahan nao hgŭm. Boh tŭ mơ̆ng gru hmô anei dưi ba yua lehanăn pŏk ngă mjing leh boh kdrŭt mtrŭt mđĭ hdră ksiêm hriăm, mĭn mrâo mơ̆ng phung knuă druh, lĭng kahan hlăm êpul, mơ̆ng anăn đru mđĭ klei thâo mjuăt bi hriăm, mprăp ai kdơ̆ng mblah mơ̆ng kluôm lĭng kahan. Grăp čô knuă druh, kahan êa krĭng 4 mâo klei thâo kjăp kơ bruă kđi čar, jhŏng mĭn, jhŏng ngă, tŭ đua klam, jhŏng mĭn mrâo, gĭr răng mgang kjăp klei dưi kiă kriê kluôm dhuôm krĭng êa ksĭ, plao ksĭ mơ̆ng ala čar.

Djă pioh nanao asăp Awa mtă: “Êlâo adih ala čar drei knŏng mâo mlam lehanăn dliê. Hruê anei drei mâo yang hruê, mâo wăl adiê, mâo êa ksĭ. Êa ksĭ drei prŏng dlông, jăk siam, brei jih jang drei thâo răng kriê bi kjăp”, grăp čô knuă druh, kahan êa krĭng 4 gĭr tui hriăm nanao. Hlăm ya boh klei mâo ăt bi hgŭm mguôp, msir mghaih jih klei dleh dlan, mprăp ai kdơ̆ng mblah, răng mgang kluôm dhuôm klei dưi kiă kriê krĭng lăn, plao kdĭ, êa ksĭ yuôm bhăn mơ̆ng ala čar./.