VOV4.Êđê- Hruê 16/2, ti anôk bruă knŭk kna, Khua knŭk kna Phạm Minh Chính gĭt gai leh Klei bi kƀĭn mơ̆ng knŭk kna thơ̆ng kơ bruă čih mkra hdră bhiăn mlan 2/2022. Blŭ hrăm ti anôk bi kƀĭn, Khua knŭk kna Phạm Minh Chính mtă, ti anôk bi kƀĭn anei, Knŭk kna lŏ dơ̆ng bi leh dŭm klei čih mkra Hdră bhiăn, klei anei dôk hlăm hdră êlan mtrŭn mơ̆ng Đảng, hluê ngă Hdră mtrŭn Klei bi kƀĭn tal XIII mơ̆ng Đảng bi mklă leh bruă rơ̆ng hdră duh bi liê kơ 3 boh kdrŭt phŭn, hlăm anăn mâo klei bhiăn. Kyua anăn, brei drei mkŏ mjing dŭm klei bi kƀĭn, bi trông čiăng tŭ mă klei blŭ đru mguôp mơ̆ng phung thơ̆ng kơ bruă, phung mă bruă kreh knhâo, phung mă bruă kriê dlăng čiăng čih mkra hdră bhiăn, hlăm anăn mâo klei dưi mơ̆ng dŭm anôk bruă djŏ tuôm. Ya bruă djŏ hŏng klei dưi mơ̆ng Phŭn bruă kđi čar, anôk bruă kƀĭn ala snăn brei mprăp hluê ngă djŏ hdră mtrŭn. Khua knŭk kna ăt mtă kơ Khua phŭn bruă, khua dhar bruă pô mtam kiă kriê, gĭt gai bruă čih mkra klei bhiăn anei, mâo dŭm klei bhiăn djŏ tuôm kơ bruă pô, čih mkra dŭm Hdră mtrŭn, Asăp mtrŭn./.

                                                    Pô mblang: H’Nêč Êñuôl