Khua knŭk kna mñă, knŭk kna Việt Nam mâo nanao klei čiăng bi hgŭm hŏng phung duh mkra China mđĭ hĭn klei pŏk phai, duh bi liê lu hĭn hlăm dŭm mta bruă mơ̆ng China mâo klei găl, Việt Nam mâo klei čiăng, msĕ si mlih mrâo klei hdră elan mă bruă, bi mlih mrô, ƀuôn prŏng thâo mĭn, bruă tuh tia mkra mjing kjăp, bruă mkra êlan klông mâo êlan êdeh treng, êlan dơ̆ng, bruă mdrao mgŭn, bruă sang hră mơar... mkŏ mjing lehanăn ngă dŭm bruă bi hgŭm djŏ hŏng klei bhiăn kuôl kă leh dua nah.

Khua knŭk kna čang hmăng kơ phung duh mkra China bi hgŭm lu hĭn, pral hĭn, hŏng kdrăp mă bruă mrâo mrang, djŏ guôp hŏng klei Việt Nam dôk čiăng, ba yua dŭm hdră êlan duh mkra mtah doh, klei duh mkra mrô, klei duh mkra knhêč, mjing klei găl kơ phung duh mkra Việt Nam bi mguôp hlăm dŭm bruă tŭ dưn mơ̆ng dŭm êpul grŭp, mơ̆ng alŭ wăl lehanăn tar rŏng./.