VOV4.Êđê- Knơ̆ng bruă tuh tia čar Kon Tum brei thâo, hlăm klei angĭn êbŭ mrô 9 thŭn 2020, knơ̆ng bruă bi êran pui kmlă hŏng ai êa Đức Nhân - Đăk Psi leh anăn knơ̆ng bruă tuh tia mnia mblei Đức Thành Gia Lai ngă leh bruă bi êran knơ̆ng dơ̆ng êa soh hŏng hdră bhiăn ngă truh klei êa lêč, hmăi kơ ngăn drăp, boh mnga bruă lŏ hma mơ̆ng 62 gŏ sang ti să Đăk Long leh anăn Đăk Psi, kdriêk Đăk Hà. Ară anei 2 thŭn êgao leh, ƀiădah 62 gŏ sang anei ka mâo ôh klei čiu hnô, klei đru.

Phŭn agha kyua knơ̆ng bruă tuh tia mnia mblei Đức Thành Gia Lai mplĕ kyua angĭn êbŭ leh anăn bruă bi êran mơ̆ng gưl bruă kơ dlông kƀah bruă đua klam hlăm klei gĭt gai, bi mguôp, ksiêm dlăng, bi klă dŭm klei hmăi čiăng ngă bruă čiu hnô, đru kơ dŭm gŏ sang. Knơ̆ng bruă tuh tia čar Kon Tum srăng mâo klei kčĕ hŏng bruă sang čư êa čar mñă kơ knơ̆ng bruă pui kmlă krĭng kwar krah mdei mă yua pui kmlă mơ̆ng sang măi anei tơdah pô duh bi liê amâo mâo ngă klei čiu hmô, đru kơ 62 gŏ sang mâo klei hmăi.

Pô mblang: Y-Ƀel Êban