Čar Kon Tum bi mklă jar hdră kčah thŭn hriăm mrâo 2024-2025 hŏng phung nai mtô gưl hđeg, gưl tlâo leh anăn mtô jêñ jêñ. Sa hlăm dŭm klei gĭt gai mơ̆ng čar hlăm bruă mprăp kơ thŭn hriăm mrâo jing amâo brei mjhua klei hrui mă prăk leh anăn ngă dleh dlan kơ phung amĭ ama hđeh sang hră kŏ thŭn hriăm mrâo.

Thŭn hriăm 2024-2025, čar Kon Tum mâo giăm 350 sang hră gưl hđeh, gưl tlâo hŏng ênoh êbeh 160 êbâo čô hđeh sang hră. Thŭn hriăm anei bruă sang hră leh anăn mtô bi hriăm čar gĭr mtrŭt jih jang hđeh hlăm gưl thŭn sang hră gưl sa nao hriăm; jih jang phung hđeh hriăm jih gưl sa lŏ hriăm adŭ 6, jih jang hđeh gưl sa hriăm aguah tlam. Êpul gơ̆ng bruă ƀuôn sang čar Kon Tum mâo leh Hdră mtrŭn kčah ênoh prăk mtô hđeh sang hră gưl điêt, sang hră gưl tlâo knŭk kna thŭn hriăm 2024-2025. Hlue anăn hnơ̆ng prăk hriăm ti čar dưi mbha 3 krĭng I, II, III. Prăk hriăm ƀiă hĭn kơ gưl 2 ti krĭng III mâo 19 êbâo prăk/hđeh sang hră/mlan, lu hĭn jing gưl hđeh leh anăn gưl 3 krĭng I mâo 52 êbâo prăk/hđeh sang hră/mlan.