VOV4.Êđê - Truh kơ ară anei, čar Kon Tum mâo lu mnuih arăng mplư nao ti Campuchia mă bruă hdjul, prăk lu leh anăn jih jang diñu jing phung mda asei sơăi. Čiăng kơ mnuih ƀuôn sang, boh nik jing alŭ wăl krĭng knông lăn leh anăn krĭng mnuih djuê ƀiă amâo mâo lĕ hlăm klei mplư anei, Êpul lĭng kahan knông lăn čar Kon Tum leh anăn bruă sang čư̆ êa alŭ wăl dôk mtrŭt mđĭ bruă hâo hưn đru kơ mnuih ƀuôn sang mđĭ hĭn klei răng.

Leh êpul kahan răng mgang knông lăn čar Kontum mâo dŏng mtlaih adei Y Liên, 16 thŭn, dôk ti ƀuôn Kei Joi, să knông lăn Đăk Sŭ, kdriêk Ngọc Hồi mơ̆ng ala čar Campuchia wĭt kơ ala čar hlăk knhal jih mlan 8 leh êgao, kahan răng mgang knông lăn Đăk Sŭ bi mguôp leh hŏng bruă sang čư̆ êa alŭ wăl mđĭ hĭn bruă hâo hưn, kčĕ mblang kơ phung ƀuôn sang thâo săng, kơ klei lačdah “Bruă hdjul, prăk mlan lu” anăn knŏng jing klei arăng duah mplư đuič. Trung tá Nguyễn Đình Thạch, khua kđông Đăk Sŭ, brei thâo: “Kđông kahan bi mguôp leh hŏng bruă sang čư̆ êa alŭ wăl mkŏ mjing bruă hâo hưn hlăm alŭ wăl, kơ mnêč jhat bŏ hŏng klei hgăm phung duah mplư hđeh mrâo prŏng nao mă bruă kơ ala tač êngao, boh nik ti Campuchia kơ klei bruă hdjul prăk mlan lu. Êpul kahan răng mgang knông lăn ăt mkŏ mjing leh mơh êpul đru mtrŭt mjhar phung ƀuôn sang nao truh hlăm grăp boh ƀuôn mtô mblang kčĕ đru čiăng kơ jih jang gŏ sang thâo săng, păn kjăp ai tiê thâo răng hŏng jih jang mnêč jhat duah mplư”.

Tui si Đào Tuấn, Khua knơ̆ng bruă sang čư̆ êa să Đăk Sŭ, kdriêk Ngọc Hồi, hlăm êbeh 7 êbâo čô phung ƀuôn sang hlăm să, snăn mnuih djuê ƀiă êbeh leh 60%. Mbĭt hŏng bruă mđĭ hĭn klei hâo hưn čiăng kơ phung ƀuôn sang mâo klei răng, đăm lĕ ôh hlăm mnêč phung mplư kơ “Bruă dhjul, prăk mlan lu”, Bruă Đảng, bruă sang čư̆ êa să ăt jih ai tiê hlak mblang čiăng kơ jih jang mnuih hlăm alŭ wăl tui duah bruă djŏ guôp lehanăn hơĭt klei hdĭp kơ pô: “Mơ̆ng êpul bruă Đảng, hlăm anăn jing êpul khua kiă kriê ƀuôn bi păn kjăp ênoh phung hđeh êdam êra mâo klei čiăng kơ bruă hlăm čar amâodah nao mă bruă kơ ala tač êngao. Bruă Đảng, bruă sang čư̆ êa mâo klei bi jmguôp hŏng dŭm anôk hưn mthâo bruă knuă mă, anôk tui tiŏ mnuih nao ngă bruă kơ ala tač êngao, čiăng mâo klei knŭk kna dưi bi đru mgang brei hŏng phung hđeh, lehanăn mnuih ngă bruă amâo mâo lŏ ôh hlăm klei arăng mplư msĕ si dŭm boh klei leh êgao”.

Čar Kontum mâo kdriêl knông lăn hŏng dua ala čar Lao lehanăn Campuchia. Păn kjăp jih jang klei phung jhat ƀai kreh duah mjhua hŏng knhuah hdĭp kpă ênô mơ̆ng phung ƀuôn sang, djăp gưt djăp hmư̆ lehanăn lu klei adôk ka thâo săng mơ̆ng phung êdam êra klei mĭn adôk êđal knŏng mĭn kơ boh tŭ dưn ti anăp, mĭndah djăp mdrŏng sah, snăn êpul kahan răng mgang knông lăn Kontum lŏ dơ̆ng hgŭm kjăp hŏng bruă sang čư̆ êa, lehanăn jih jang djăp êpul êya jih ai tiê păn kjăp alŭ wăl gang mkhư̆ bi hmao, čiăng kơ phung ƀuôn sang đăm lĕ ôh hlăm mnêč jhat, duah mplư: “bruă hdjul, prăk mlan lu”. Đại tá Lê Quốc Việt, Khua kiă kriê kđông kahan răng mgang knông lăn čar Kontum, brei thâo: “Knơ̆ng kiă kriê ăt mâo leh klei gĭt gai djăp kđông kahan răng mgang knông lăn lŏ dơ̆ng hâo hưn mtô mblang, mtrŭt mjhar phung ƀuôn sang brei mâo klei thâo răng, đăm lŏ lĕ hlăm klei mnêč phung mplư ôh, čiăng duah ktung ba boh nik hŏng phung hđeh êdam êra, thŭn adôk mda ênưih snăk lĕ hlăm klei arăng mplư đuĕ nao kơ Campuchia. Lehanăn Knơ̆ng kiă kriê ăt mâo leh mơh klei hâo mdah hŏng bruă Đảng čar, hŏng knơ̆ng bruă sang čư̆ êa čar, lehanăn dŭm anôk bruă anăn mâo leh mơh klei lŏ kiă kriê gĭt gai jih jang djăp êpul êya bruă hlăm čar bi mđrăm mbĭt ngă jăk hĭn bruă anei. Hmei mă leh bruă hŏng 4 boh kdriêk ti knông lăn lehanăn mtă kơ dŭm kdriêk gĭt gai dŭm adŭn bruă djŏ tuôm bi mguôp hŏng êpul kahan răng mgang knông lăn ngă jăk hĭn bruă kiă kriê alŭ wăl, lehanăn mâo klei hâo hưn mtă mtăn, mjuăt bi hriăm phung ƀuôn sang amâo mâo lĕ hlăm klei arăng mplư, ktung ba nao kơ Campuchia ôh”./.

Y-Khem pô mblang