VOV4.Êđê - Hlăm hdră êlan sa ai hŏng phung duh mkra, knơ̆ng bruă sang čư̆ êa čar Kontum mrâo mkŏ mjing leh klei bi trông hŏng phung duh mkra. Mâo leh êbeh 10 klei blŭ ti anăp, lehanăn 32 klei blŭ mơĭt hŏng hră mơar truh hŏng phung khua kiă kriê čar Kontum, ti anôk bi blŭ hrăm anei, dưi ƀuh jih jang phung duh mkra dôk găn lu klei dleh dlan hlăm bruă duh mkra mnia mblei, êmưh hlăm klei čuăl mkă, lehanăn djăp mta klei dleh dlan kyua lăn ala.

Mbĭt hŏng anăn gun kpăk kyua klei ksiêm mkă, mưn yua lăn dliê, pioh pla ana êa drao, lehanăn klei mđĭ kyar bruă hiu čhưn ênguê lăn mnga êa mơak, ăt jing sa klei dleh dlan mrâo, jih jang bruă knuă lĕ hlăm klei êmưt. Êpul hgŭm phung duh mkra mda asei Kontum ăt bi êdah mâo 11 klei akâo kơ knơ̆ng bruă sang čư̆ êa čar Kontum kyua klei êmưt ruh mgaih bruă knuă djŏ tuôm hŏng lăn ala pioh mâo anôk duh bi liê kơ bruă duh mkra mnia mblei. Čih pioh jih jang klei akâo anăn mơ̆ng phung duh mkra, phung khua kiă kriê Kontum mtă kơ dŭm knơ̆ng dhar bruă, mđing hmư̆ hrŏng ruah lehanăn mâo hdră êlan mghaih msir bi djŏ hŏng klei dưi pô, lehanăn bi klin ba mtruh kơ gưl dlông djăp mta bruă êgao klei dưi pô, kñăm čiăng dưi đru bi pral phung duh mkra hơĭt bruă knuă mđĭ kyar bruă duh mkra mnia mblei hŏng klei kjăp./.

Y-Khem pô mblang