VOV4.Êđê- Tlam mbruê, ti ƀuôn prŏng Kon Tum, êpul khua bruă Đảng čar Kon Tum mkŏ mjing leh klei kƀĭn mklin bruă klei mrâo thŭn 2021 leh anăn bi tuôm hŏng 135 čô pô bi ala êpul phung knhâo knhăk, phung čih yăl dliê, phung ngă klei mrâo thŭn 2022.

Hlăm klei čih yap mơ̆ng êpul bruă hâo hưn čar Kon Tum leh anăn klei blŭ mơ̆ng khua bruă Đảng čar, khua gĭt gai êpul gơ̆ng bruă ƀuôn sang čar Kon Tum Dương Văn Trang hlăm klei kƀĭn anei brei ƀuh, thŭn 2021, hlăm wưng klei ruă tưp Covid-19 dleh dưi ksiêm dlăng, ƀiădah čar Kon Tum dưi ngă jăk bruă klam mdua, gang mkhư̆ klei ruă tưp leh anăn mđĭ kyar bruă duh mkra ala ƀuôn, dưi ba wĭt lu boh tŭ dưn yuôm bhăn.

Dưi mâo dŭm boh tŭ anei kyua mâo klei đru mguôp mơ̆ng phung knhâo knhăk, phung čih yăl dliê, phung ngă klei mrâo, hưn mdah hdră êlan, klei siam knhuah gru dhar kreh dŭm djuê ana ti čar Kon Tum. Khua gĭt gai čar Kon Tum mtă kơ dŭm gưl bruă, dhar bruă lŏ mkŏ mjing klei găl kơ phung knhâo knhăk, phung čih yăl dliê, phung ngă klei mrâo dưi đru mguôp lu hĭn hlăm bruă mkŏ mjing leh anăn đĭ kyar čar Kon Tum.

Pô mblang: Y-Ƀel Êban