VOV4.Êđê - Tui ngă hdră ala čar kñăm “Grăp să sa mnơ̆ng dhơ̆ng OCOP”, thŭn 2021 čar Kon Tum mkŏ mjing leh 58 mta mnơ̆ng dhơ̆ng OCOP mđĭ ênoh dŭm mta mnơ̆ng dhơ̆ng OCOP mơ̆ng čar Kon Tum jing 146 mta leh anăn dŭm mta anăn mâo sơăi mơ̆ng 3 – 5 mtŭ. Amâo djŏ knơ̆ng sơnăn, hlăm wưng dleh dlan kyua klei ruă tưp Covid-19, phung pô kiă kriê mnơ̆ng dhơ̆ng OCOP, dhar bruă djŏ tuôm čar Kon Tum mâo leh lu klei mlih mrâo hlăm klei bi mguôp, ba čhĭ mnơ̆ng dhơ̆ng OCOP truh kơ phung blei ba yua, đru bi hơĭt klei hdĭp mnuih ƀuôn sang hlăm krĭng ƀuôn sang.

Să Đăk Pxi, kdriêk Đăk Hà, čar Kon Tum hing ang hŏng mta mnơ̆ng OCOP êbŭng alê dliê ƀhu krô. Thŭn 2021, mnuih ƀuôn sang hlăm să nao mă, mkra hlăm brô 12 ton êbŭng alê dliê ƀhu krô ba čhĭ kơ wăl anôk mnia mblei. Hlăm wưng klei ruă Covid 19 dôk bluh mâo dleh dưi ksiêm dlăng, mta mnơ̆ng OCOP êbŭng alê dliê ƀhu krô mơ̆ng să Đăk Pxi ăt mâo mnuih blei yua khăp čiăng. Ayŏng A Sáo, ƀuôn Kon Pao Kla, brei thâo, kyua nao hgŭmm kra mnơ̆ng OCOP mđĭ leh boh tŭ yuôm, mnuih ƀuôn sang hlăm să lŏ mâo hnư hrui wĭt mkra mđĭ klei hdĭp, mơ̆ng anăn lŏ mđing hĭn kơ mta mnơ̆ng mơ̆ng pô “Mphŭn mơ̆ng mlan 7 mnuih ƀuôn sang nao hlăm dliê duah mă êbŭng alê. Mnuih ƀuôn sang čŏng pô mkra êbŭng alê krô. Čiăng dưi mâo mta mnơ̆ng doh, jăk, ba čhĭ kơ wăl anôk mnia mblei, dơ̆ng mơ̆ng leh mă wĭt êbŭng alê drei pral alôk hĕ tôk ti tač lehanăn nao tŭk mtam. Leh ksă kdjŏng mă tram hlăm êa ê’ăt, doh doh lehanăn drei khăt điêt nao ƀhu amâo dah bi mthu hŏng pui hdăng. Êlâo kơ đŭng êbŭng hlăm hruh, drei ruah êbŭng siam snăn kơh mâo lu mnuih khăp blei, khăp ƀơ̆ng. Mnuih ƀuôn sang mâo hnư hrui wĭt h’ĭt mơ̆ng êbŭng alê kyua anăn mnuih ƀuôn sang hĭn mơh mâo klei đua klam hŏng bruă”

Thŭn 2021, hlăk klei ruă Covid 19 dôk bluh mâo dleh dưi ksiêm dlăng, dŭm anôk bruă duh mkra, êpul hgŭm bruă, gŏ êsei mă bruă duh mkra mơ̆ng čar Kon Tum ăt mâo 58 mta mnơ̆ng OCOP hŏng dŭm mta mnơ̆ng mkra mâo ti alŭ wăl. Hlăm anăn, êdah êdi jing dŭm mta mnơ̆ng mkra mơ̆ng sâm Ngọc Linh, kphê, sâm hruê̆, boh kroh... Amai Hồ Thị Kim Oanh, Khua anôk bruă mguôp hnư mnia mblei – mkra mjing Lâm Thịnh ti kdriêk Đăk Tô brei thâo, anôk bruă duh mkra dưi mkra leh Čê sâm hruê̆ Ngọc Linh djăp hnơ̆ng čuăn 3mtŭ lehanăn dôk bi leh hdră mkra mjing dŭm mta mnơ̆ng mkăn: “Anôk bruă mrâo nao hgŭm hlăm hdră OCOP. Hlăk wăl anôk mnia mblei ai bi ktưn mnia mblei mkă hŏng dŭm mta mnơ̆ng mnia mblei mkăn mâo leh mơ̆ng sui snăn pô ăt kƀah lu snăk. Leh 2 thŭn nao hgŭm hlăm hdră OCOP, dŭm mta mnơ̆ng mâo mkra mđĭ leh lu êdi. Kơ klei mnia mblei ăt đĭ 50% mơh hlăm ai bi ktưn, hruh đŭng siam lehanăn hnơ̆ng tŭ jăk mnơ̆ng dhơ̆ng. Hlăk pô ba čhĭ hlăm wăl anôk mnia mblei điện tử Shopee mnơ̆ng pô ăt jăk mơh mkă hŏng dŭm mta mnơ̆ng mkăn.

Tĭng truh kơ jih thŭn 2021, čar Kon Tum dưi mâo leh 146 mta mnơ̆ng OCOP mâo mơ̆ng 3 truh kơ 5 mtŭ. Čiăng bi mklă anăn knăl, mđĭ boh tŭ yuôm mnơ̆ng dhơ̆ng, hdră bi hgŭm wăl anôk mnia mblei mâo mđing dlăng. Hlăm wưng bluh mâo klei ruă Covid 19, pô dŭm mta mnơ̆ng OCOP pral bi mlih jing hdră mnia mblei điện tử msĕ si ti Lazada, Shopee, Sendo, Tiki. Lương Thị Mỹ Huệ, Khua anôk bruă TNHH Thảo dược Tây Nguyên, mñă klă anôk bruă duh mkra tŭ jing leh kbiă hriê mơ̆ng klei bi mlih djŏ guôp: “Amâo dưi hluê ngă dŭm hdră mtrŭt mđĭ bruă mnia mblei kyua anăn anôk bruă duh mkra brei tui duah hdră êlan djŏ kơ pô. Anôk bruă duh mkra nao hgŭm leh hlăm wăl anôk mnia mblei điện tử msĕ si Tiki, Shoppe. Knŏng hdră anei yơh dưi krơ̆ng bruă duh mkra mnia mblei. Wăl anôk mnia mblei anei jăk lehanăn tŭ dưn êdi”.

Nguyễn Quang Hòa, K’iăng khua anôk bruă mđĭ kyar krĭng ƀuôn sang čar Kon Tum brei thâo, hlăm wưng dleh dlan mơ̆ng klei ruă Covid 19, hrăm mbĭt hŏng anôk bruă duh mkra, êpul bruă, gŏ êsei mă bruă duh mkra čiăng hrui blei leh mta mnơ̆ng OCOP, êpul hluê ngă leh jăk bruă klam bi hgŭm hŏng wăl anôk mnia mblei, đru hrui blei mnơ̆ng lŏ hma. Mơ̆ng anăn, đru bi hrŏ tuič hnơ̆ng klei hmăi mơ̆ng klei ruă tưp lehanăn ăt đru mtrŭt mđĭ hdră bi mnia mblei điện tử: “Hlăk dôk hlăm wưng bluh mâo klei ruă Covid 19, Knơ̆ng bruă lŏ hma đru kčĕ leh kơ Anôk bruă sang čư̆ êa čar mkŏ mjing êpul bruă gĭt gai lehanăn bi hgŭm hrui blei mnơ̆ng dhơ̆ng mơ̆ng bruă lŏ hma ti alŭ wăl čar. Pô ăt hưn mthâo kluôm mta mnơ̆ng OCOP kơ Phŭn bruă Lŏ hma lehanăn mtrŭt mđĭ hdră mnia mblei điện tử. Hluê hŏng anăn, arăng srăng hưn mthâo kơ dŭm êpul êya mkăn bi hrui blei hlăm wưng ti anăp. Bi dôk anôk čhĭ mnơ̆ng pô ăt hưn mthâo mnơ̆ng OCOP pô mnâo djăp leh hnơ̆ng čuăn.

Dŭm anôk bruă duh mkra, êpul bruă, gŏ êsei mă bruă duh mkra čar Kon Tum thŭn êgao mâo leh klei bi mlih nao kơ hdră mnia mblei điện tử mjing leh boh kdrŭt êdah êdi hlăm bruă hrui blei mnơ̆ng dhơ̆ng hlăm wưng bluh mâo klei ruă Covid 19. Mnuih ƀuôn sang amâo dôk ksŭn lu mta mnơ̆ng lŏ hma, mâo hnư h’ĭt rơ̆ng kơ Têt anei trei mđao, djăp ênŭm./.