VOV4.Êđê -  Bruă Đảng čar Kon Tum mâo leh hdră mtrŭn ƀuah mkra brei mdei jih bruă hlăm Đảng hŏng Đặng Thanh Nam, K’iăng Khua bruă Đảng kdriêk, Khua Knơ̆ng bruă sang čư̆ êa kdriêk Kon Plong.

Dưi thâo mta phŭn ngă kơ Bruă Đảng čar Kon Tuam ƀuah mkra Đặng Thanh Nam jing djŏ tuôm kơ bruă kriê dlăng lăn ala leh anăn duh bi liê mkŏ mjing. Êdah êdi jing bruă Đặng Thanh Nam gĭt gai rŭ mdơ̆ng Hdră bruă ba yua lăn Wăl rŭ mdơ̆ng nah Dưr wăl krah kdriêk Kon Plông hŏng hnơ̆ng prŏng 21ha hlăk ka dưi bi mlih hdră kñăm ba yua lăn, ka dưi mkăp klei dưi bi mklă dŭm hdră kčah hdră bhiăn kơ bruă duh bi liê knŭk kna. Bruă Đảng čar Kon Tum bi mklă, klei Đặng Thanh Nam ngă soh prŏng, ngă kơ mnuih ƀuôn sang bi mĭn amâo jăk kơ knuă druh, đảng viên lehanăn yang ƀuôn, bi hrŏ klei đăo knang gưl bruă đảng, bruă sang čư̆ êa alŭ wăl leh anăn Đặng Thanh Nam.

         H’ Zawut pô mblang