VOV4.Êđê- Hlăm 2 hruê 24 lehanăn 25/4, Êpul mă bruă mơ̆ng Dhar bruă djuê ana mâo Hầu A Lềnh, Khua hlăm Anôk bruă Đảng gưl dlông, Khua phŭn bruă hlŏng klam khua Dhar bruă djuê ana ngă khua êpul nao mă leh bruă hŏng čar Kon Tum kơ boh tŭ hluê ngă hdră bruă djuê ana; bruă hluê ngă hdră ala čar kñăm mđĭ kyar bruă duh mkra ala ƀuôn krĭng mnuih ƀuôn sang djuê ƀiă lehanăn krĭng čư̆ čhiăng, wưng tal 1 mơ̆ng thŭn 2021- 2025 ti alŭ wăl čar Kon Tum.

Čar Kon Tum mâo ênoh mnuih êbeh 568.000 čô hŏng 43 djuê ana, mnuig ƀuôn sang djuê ƀiă êbeh 54,9%. Khădah grăp thŭn čar bi hrŏ mơ̆ng 3 – 4% ênoh gŏ êsei, ƀiădah truh ti thŭn 2021 čar ăt mâo giăm 22.000 gŏ êsei ƀun, truh giăm 16% ênoh gŏ êsei kluôm čar, hlăm anăn ênoh gŏ êsei mnuih djuê ƀiă ƀun truh 94%.

Blŭ ti knăm anei, Khua phŭn bruă hlŏng klam khua Dhar bruă djuê ana Hầu A Lềnh mtă, hlăm bruă hluê ngă hdră ala čar kñăm mđĭ kyar bruă duh mkra ala ƀuôn krĭng mnuih ƀuôn sang djuê ƀiă lehanăn krĭng čư̆ čhiăng, čar Kon Tum brei mprăp djăp dŭm hdră hluê ngă. Mbĭt anăn hŏng bruă pŏk ngă hdră kñăm ala čar thŭn 2022 brei mprăp prăk duh kơ thŭn 2023. Khua phŭn bruă mtă kơ čar Kon Tum brei mđing thiăm mbŏ mnuih mă bruă ngă hdră bruă djuê ƀiă djŏ si klei kčah mtrŭn./.

                                                    Pô mblang: H’Nêč Êñuôl