VOV4.Êđê- Bruă đru mjuăt bi hriăm, mđĭ klei thâo kơ mnuih mă bruă ala čar Lao đru hyuă kjăp hĭn klei bi hgŭm mguôp, mjĕ mjuk Việt Nam- Lào. Dŭm pluh thŭn êgao, čar Kon Tum jing anôk hriê mơ̆ng lu phung sinh viên ala čar ƀĭng găp. Hŏng phung sinh viên Lao, diñu gĭr truh ti Việt Nam hriăm, mđĭ klei thâo čiăng wĭt đru mkŏ mkra, mđĭ kyar lăn čar snăn Kon Tum, krĭng lăn dôk lu klei dleh dlan ti krĭng Lăn dap kngư msĕ si jing ƀuôn sang tal 2 mơ̆ng diñu.

Dŭm thŭn giăm anei, anôk bruă sang hră gưl prŏng Đà Nẵng ti čar Kon Tum jing anôk čuăn ruah mơ̆ng lu phung hđeh sang hră gưl prŏng Lào. Ară anei, klei êrô êbat mơ̆ng 4 čar mơ̆ng ala čar Lào mâo: Attapeu, Sekong, Champasack leh anăn Saravane jing jăk găl êdi. Mbĭt hŏng anăn, anôk bruă sang hră gưl prŏng Đà Nẵng ti čar Kon Tum dôk mtô mjuăt bi hriăm lu mta bruă msĕ si: Klei bhiăn, ngă bruă, kriê dlăng bruă mnia mblei, tĭng mkă ngăn prăk… Mâo ênŭm hnơ̆ng čoh čuăn mđĭ kyar ai dưi ngă bruă kơ ala čar Lào. Ară anei, anôk bruă dôk mâo 10 čô hđeh sang hră gưl prŏng Lào hluê hriăm, hlăm anăn hđeh sang hră dưi mâo klei đru hriăm hră mơar mơ̆ng čar Kon Tum, čar Gia Lai hŏng klei đru mơ̆ng 2 čar jing 100% leh anăn mơ̆ng anôk bruă sang hră jing 50% ênoh prăk tla klei hriăm hră mơar. Phung amâo mâo klei đru hriăm hră mơar nao jing čŏng tla mă. Nai Võ Thị Thanh Thảo, khua adŭ bruă đru kơ phung hđeh sang hră, anôk bruă sang hră gưl prŏng Đà Nẵng ti Kon Tum brei thâo, sang hră mâo nanao klei uêñ mĭn, mđing tal êlâo kơ phung hđeh sang hră gưl prŏng mơ̆ng Lào mơ̆ng phung kčưm diñu truh ti čar Kon Tum.

“Čiăng đru kơ phung ƀĭng găp mâo wăl mjĕ êrô, tui hriăm, sang hră ăt mkăp brei anôk dôk mmĭt hŏng phung hđeh sang hră gưl prŏng Việt Nam, čiăng kơ diñu mâo sa wăl hdĭp jăk hĭn. Êngao kơ mmông hriăm hlăm adŭ, diñu dưi nao hgŭm hlăm lu mta bruă mơ̆ng hđeh sang hră gưl prŏng Việt Nam leh anăn jih jang dŭm adŭ bruă, anôk bruă srăng dưi đru jih hnơ̆ng kơ diñu”.

Phung nai hŏng hđeh sinh viên Lao ngă knăm kă klei ti kngan hlăm Knăm mơak djuê ân Bunpimay

Bi hŏng phung hđeh sang hră gưl prŏng mơ̆ng Lào dôk hluê hriăm ti anôk bruă sang hră gưl prŏng Đà Nẵng ti čar Kon Tum, hlăm wang êbeh 2 thŭn klei ruă tưp Covid-19 bluh đĭ jing klei amâo mâo dưi wơr ôh hŏng diñu. Klei ruă tưp ngă kơ diñu amâo mâo dưi wĭt čuă gŏ sang leh anăn bi hrŏ hĕ dŭm mta bruă ngă čiăng rơ̆ng bruă gang mkhư̆ klei ruă tưp. Phung nai hlăm wưng anei jing leh phung amĭ, phung ama đru mđĭ ai, đru kơ diñu lŏ dơ̆ng ngă klei hriăm hră mơar.

Mniê hđeh sang hră gưl prŏng Vongkhamlar Thipphada, sang ti čar Saravane, dôk hriăm thŭn tal 4, klei bhiăn bruă duh mkra lŏ hdơr, kâo klei klei kdjăt leh anăn mơak sơnăk kyua dưi drông knăm knhuah gru Bunpimay, dưi nao drông thŭn mrâo, kă mrai ti kngan leh anăn kdŏ lăm vông ti Việt Nam. Ƀuh phung hđeh sang hră gưl prŏng Lào amâodưi wĭt drông thŭn mrâo, phung nai gĭr ktưnđru phung diñu dưi hdĭp hlăm ai êwa mơak mnai mơ̆ng ƀuôn sang pô, bi hrŏ ƀiă klei ênguôt kơ gŏ sang. Adei Vongkhamlar Thipphada brei thâo:

“Phung nai leh anăn sang hră mkŏ mjing knăm knhuah gru Lào kơ phung hmei ti Việt Nam, kâo ƀuh jing jăk leh anăn mơak êdi. Lŏ mâo hnư mnơ̆ng brei kơ hmei. Kyuamâo phung nai yơh hmei dôk tinei mâo klei mdul êdi. Phung nai đru hmei jing lu êdi. Phung hmei mâo klei dleh dlan srăng hưn phung diñu leh anăn diñu đru kơ hmei”.

Sinh viên Lao hriăm đŭng điŏ hlăm Knăm Tết djuê ana Việt Nam

Hŏng klei đru jih hnơ̆ng mơ̆ng phung nai ti anôk bruă sang hră gưl prŏng Đà Nẵng ti čar Kon Tum. Lu phung hđeh sang hră gưl prŏng mơ̆ng Lào kreh kriăng hriăm hră mơar. Thongkhamsouk Koungthong, hđeh sang hră gưl prŏng thŭn tal 4, hriăm bruă klei hưn mthâo mrâo mrang brei thâo, sang kâo ti čar Champasack, amĭ ama ngă bruă lŏ hma, kyuanăn klei hdĭp gŏ sang dôk dleh dlan. Mơ̆ng klei gĭr ktưn, kâo hriê hriăm ti Việt Nam čiăng tui tiŏ klei hmăng hmưi. Dưi hluê hriăm, hdĭp hlăm sa wăl jăk, mâo klei khăp mơ̆ng phung nao leh anăn phung ƀĭng găp, Thongkhamsouk Koungthong gĭr ktưn hluê hriăm leh anăn ƀuh klei đăo knang kơ asei pô. Thongkhamsouk Koungthong yăl dliê kơ dŭm klei mĭn leh anăn klei mĭn tĭng kơ mgi dih mơ̆ng pô:

“Phung ƀĭng găp ti Việt Nam jăk êdi hŏng hmei, mâo bruă đru mtam kơ hmei, wăt kơ bruă hriăm hră mơar. Kâo ƀuh bruă kâo hriăm mkă hŏng bruă mkăn ñu dleh hĭn, ƀiădah ăt gĭr hriăm tơl tuč. Hŏng kâo, mâo hriăm ti Việt Nam jing jăk hĭn leh mkă hŏng hriăm ti lào. Kâo ƀuh bruă hưn mthâo mrâo mrang ară anei dôk đĭ kyar leh anăn mâo lu knơ̆ng bruă čiăng kơ mnuih mă bruă hluê hriăm bruă anei. Kâo mĭn leh ruê̆ klei hriăm srăng wĭt akâo bruă ti Lào. Kâo srăng hưn mdah hŏng phung hđeh mrâo leh ruê̆ klei hriăm gưl 3 jing hriăm ti Việt Nam srăng jăk hĭn.”

Nai mtô Sang hră gưl prŏng Đà Nẵng ti Kon Tum bi trông klei hriăm hră hŏng sinh viên Lao

Klă sĭt brei ƀuh bruă mtô mjuăt bi hriăm, mđĭ kyar ai dưi mă bruă hŏng ala čar mah jiăng jing sa klei jăk siam mơ̆ng klei bi mguôp, bi hgŭm, klei siă suôr Việt Nam – Lào. Dŭm sang hdră gưl krah dưh, gưl krah hlăm lu thŭn êgao jing anôk čuăn ruah mơ̆ng lu phung hđeh sang hră gưl prŏng mơ̆ng Lào. Hŏng phung mda asei mơ̆ng ala čar lu êman hŏng klei gĭr ktưn hriê hluê hriăm ti Việt Nam, hriăm lu klei thâo wĭt mkŏ mjing, mđĭ kyar ala čar Lào, Kon Tum, krĭng dôk mâo lu klei dleh dlan ti alŭ wăl krĭng Lăn Dăp Kngư msĕ hŏng sa hdră bhiăn jing ƀuôn sang tal 2 kơ diñu./.

Pô mblang: Y-Ƀel Êban