VOV4.Êđê- Hlăm wưng giăm anei ti Kon Tum mâo lu anôk bruă duh mkra lehanăn gŏ êsei ngă bruă duh mkra duh bi liê Anôk mkă knăng điện tử čiăng hrui blei mnơ̆ng lŏ hma. Boh sĭt brei ƀuh, mbĭt hŏng bruă đru kơ mnuih ƀuôn sang, boh nik ti krĭng taih kbưi, krĭng mnuih djuê ƀiă hrui blei mnơ̆ng lŏ hma snăn dŭm Anôk mkă knăng điện tử anei dôk mâo lu klei soh čhuai hmăi truh kơ bruă mnia mblei.

Êlan dơ̆ng mrô 678 găn nao 4 să: Đăk Tơ Kan, Đăk Kơ Ông, Đăk Sao leh anăn Đăk Na, kdriêk Tu Mơ Rông, čar Kon Tum mâo boh taih knŏng 27km ƀiădah mâo truh 10 anôk mkă hŏng knăng điện tử hrui blei boh mnga bruă lŏ hma. Hlăm anăn knŏng kdrêč êlan găn alŭ wăl să Đăk Rơ Ông mâo lu hĭn hŏng 5 anôk mkă. Ngụy Đình Phúc, khua êpul ksiêm dlăng anôk mnia mblei mrô 2, anôk bruă kriê dlăng anôk mnia mblei čar Kon Tum brei thâo, hlăm klei ksiêm dlăng boh sĭt brei ƀuh dŭm anôk mka điện tử hrui blei boh mnga bruă lŏ hma mâo sơăi klei ngă soh:

 “Tal 1 jing dŭm anôk mkă hŏng knăng điện tử amâo mâo ôh tem anăn knăl mnơ̆ng dhơ̆ng leh anăn hdră bi klă djŏ hŏng hdră bhiăn. Dŭm anôk hrui blei boh mnga bruă lŏ hma amâo mâo bi klă ênoh hluê si hdră bhiăn kyuanăn ênoh mơ̆ng dŭm anôk mkă mâo klei bi kpleh, kyuanăn mnuih ƀuôn sang srăng tŭ klei hmăi êjai ba čhĭ hbei ƀlang. Hmei mâo klei đing hnơ̆ng tŭ jăk mơ̆ng dŭm boh knăng anăn jing amâo jăk ôh.”

Ksiêm dlăng thâo ƀuh lu anôk mkă điện tử ngă soh

Mbĭt hŏng dŭm klei ngă soh hlăm klei mnia mblei msĕ si: amâo mâo hră brei mnia mblei, knăng amâo mâo anăn knăl, amâo ênŭm leh anăn amâo mâo hdră mơar anôk mkă, mnia mblei amâo djŏ anôk, amâo bi klă ênoh hrui blei…10 anôk mkă hŏng knăng điện tử hrui blei boh mnga bruă lŏ hma ktuê êlan êlan dơ̆ng 678 găn nao 4 să hlăm kdriêk Tu Mơ Rông lŏ mâo dŭm klei ngă soh msĕ si: pŏk êlan mkŏ hŏng êlan dơ̆ng soh hŏng hdră bhiăn, kkuai djiêu êlan mdưm knăng mkă điện tử, rŭ mdơ̆ng sang ti anôk pioh kơ êlan êbat jơ̆ng. Nguyễn Thái Hoàng Anh, pô thơ̆ng kơ bruă ksiêm dlăng, knơ̆ng bruă êlan klông leh anăn dŭ mdiăng čar Kon Tum brei thâo:

         “Boh klei tal êlâo hĭn jing pŏk êlan mkŏ hŏng êlan dơ̆ng soh hŏng hdră bhiăn ka mâo ôh klei tŭ ư mơ̆ng dŭm anôk bruă djŏ tuôm. Bruă anei srăng ngă truh dŭm klei kpăk hlăm dŭm anôk diñu pŏk êlan. Êngao kơ bruă anei ăt srăng lŏ lač kơ sa klei jing hlăm wưng tŭ ư klei mnia mblei amâo mâo klei hrăm mbĭt. Djŏ sĭt jing êlâo kơ mâo hră tŭ ư bi klă klei mnia mblei, pô anăn srăng mâo hră tŭ ư pŏk mkŏ, ƀiădah ti nei lŏ ngă mklăk hŏng anăn, kyuanăn yơh ară anei mâo dŭm klei ngă soh msĕ sơnăn”.

Anôk mkă điện tử ti alŭ Mô Bành, să Đăk Rờ Ông dưi ti lăn pioh kơ êlan êbat jơ̆ng

Hluê si klei tĭng mkă mơ̆ng dŭm anôk bruă djŏ tuôm ti kdriêk Tu Mơ Rông brei ƀuh, hlăm alŭ wăl ară anei mâo 15 anôk mkă hŏng knăng điện tử hrui blei boh mnga bruă lŏ hma, lu hĭn jing hrui blei hbei ƀlang mơ̆ng mnuih ƀuôn sang. Êngao kơ dŭm bruă jing đru kơ mnuih ƀuôn sang, boh nik jing krĭng taih kbưi, krĭng mnuih djuê ƀiă, dŭm anôk mkă anei ăt dôk mâo lu klei ngă soh, hmăi amâo jăk truh kơ klei mnia mblei leh anăn klei amâo djŏ ai hlăm mnuih ƀuôn sang. Klă klơ̆ng msĕ si klei amâo djŏ boh ktrŏ, mă % djah djâo hlăm boh mnga bruă lŏ hma ngă truh klei hmăi amâo jăk kơ ƀĭng ngă lŏ hma, ngă klei amâo klă knăm bi hrŏ ênoh blei, êjai dŭm sang măi hrui blei mơ̆ng 2.300 truh kơ 2.400 prăk hlăm sa kg, bi kơ dŭm anôk mkă anei knŏng hrui blei mă mơ̆ng 1.800 truh kơ 2.000 prăk/kg leh anăn mâo đa đa anôk ăt ƀiă hĭn. Ti anăp bruă dŭm anôk mkă hŏng knăng điệt tử, hrui blei boh mnga bruă lŏ hma hlăm alŭ wăl mâo lu klei ngă soh, hmăi truh kơ bruă mnia mblei, klei êđăp ênang krĭng ƀuôn sang, Phạm Xuân Quang k’iăng bruă sang čư êa kdriêk Tu Mơ Rông brei thâo, bruă sang čư êa kdriêk ăt mâo leh klei gĭt gai kơ bruă anei.

“Kdriêk ăt mđĭ hĭn leh klei gĭt gai kơ dŭm să, ksiêm dlăng kjăp hĭn amâo lŏ brei mâo ôh dŭm anôk mkă mkăn. Hŏng dŭm anôk mkă, kdriêk mâo leh hdră mtrŭn brei dŭm anôk mkă hnưm bi leh hră mơar djŏ hŏng hdră bhiăn leh anăn hluê ngă djŏ klei bhiăn ala čar. Bi kơ dŭm anôk mkă mâo dŭm klei ngă soh hmei ăt mâo leh klei blu hrăm hŏng phung ksiêm dlăng êlan klông djŏ tuôm hŏng dŭm anôk pŏk mkŏ. Leh anăn hnơ̆ng tŭ jăk knăng mkă, bi kơ ênoh ênil hmei mâo leh klei mă bruă hŏng anôk bruă kriê dlăng anôk mnai mblei mbĭt hŏng anôk bruă tĭng mkă hnơ̆ng tŭ jăk knơ̆ng bruă kreh knhâo čiăng kriê dlăng, ksiêm dlăng”.

Hlăm 10 kdriêk, ƀuôn prŏng ti čar Kon Tum, knŏng yap mă 2 alŭ wăl ti kdriêk Tu Mơ Rông leh anăn Đăk Tô ară anei mâo 32 anôk mkă hŏng knăng điện tử hrui blei boh mnga bruă lŏ hma. Boh tŭ hlăm klei ksiêm dlăng mơ̆ng êpul ksiêm dlăng anôk mnia mblei mrô 2, anôk bruă kriê dlăng anôk mnia mblei čar Kon Tum, knơ̆ng bruă klei kreh knhâo leh anăn mrâo mrang mbĭt hŏng dŭm anôk bruă djŏ tuôm 2 kdriêk anei brei ƀuh, păt čiăng jih dŭm anôk mkă hŏng knăng điện tử mơ̆ng knơ̆ng bruă leh anăn gŏ sang mnia mblei mdưm anăn amâo rơ̆ng djŏ hŏng hdră bhiăn. Leh anăn kăn ngă djŏ lei dŭm hdră kriê dlăng mơ̆ng êlâo truh kơ bruă dŭm anôk mkă hŏng knăng điện tử hrui blei boh mnga bruă lŏ hma ngă truh lu klei amâo jăk hlăm bruă mnia mblei leh anăn klei êđăp ênang krĭng ƀuôn sang, kyuanăn čiăng mâo mtam klei ƀư̆ mkra.

        Pô mblang: Y-Ƀel Êban