VOV4.Êđê- Ti čar Kon Tum mâo lu bruă kriê dlăng Têt kơ mnuih ƀuôn sang dôk dưi pŏk ngă. Knơ̆ng bruă sang čư̆ êa čar ăt bi mklă kơ hnơ̆ng đru kơ gŏ êsei ƀun leh anăn giăm ƀun drông Tết Nguyên đán Nhâm dần thŭn 2022. Hluê anăn, ênoh bi liê mơ̆ng čar Kon Tum pioh đru gŏ êsei ƀun leh anăn giăm ƀun drông Tết Nguyên đán Nhâm dần 2022 mâo giăm 16 êklai prăk. Hlăm anăn hnơ̆ng đru hŏng gŏ êsei ƀun mâo 600 êbâo prăk leh anăn hŏng gŏ êsei giăm ƀun jing 300 êbâo prăk.

Ti čar Kon Tum hlăm dŭm hruê anei snăn ăt dôk mkŏ mjing lu bruă kriê dlăng Tết kơ mnuih ƀuôn sang, boh nik mnuih ƀuôn sang krĭng taih kbưi, krĭng mnuih djuê ƀiă leh anăn krĭng knông lăn. Truh hruê anei dŭm êbâo hnư mnơ̆ng Tết dưi mđup brei truh kơ kngan gŏ êsei amâodah phung hđeh mâo klei hdĭp dleh dlan. Dŭm hdră, msĕ si: Yan mnga knông lăn hơĭt ai tiê mnuih ƀuôn sang, “Hrăm mbĭt hŏng phung mniê knông lăn”. “Hruê ƀêñ điŏ mtah”… dưi mkŏ mjing mơ̆ng wưng anei truh dŭm hruê giăm Têt ba ai êwa Tết trei mđao, khăp hơiêng hŏng grăp čô mnuih.

Pô mblang: H’Zawut Ƀuôn Yă