VOV4.Êđê- Mbĭt hŏng hdră mprăp čiăng kơ klei bi lông gưl 3 dưi mkŏ mjing êđăp ênang, klă mngač, dŭm gưl lehanăn dhar bruă djŏ tuôm ti Kon Tum mâo leh hdră kčah đru kơ phung hđeh mâo klei hdĭp dleh dlan. Tĭng truh ară anei, êbeh 4.700 čô hđeh mŏng čar nao hlăm klei bi lông gưl 3 thŭn anei, mâo êbeh 1.200 čô hđeh dôk hlăm anăn dưi đru, kah knar 314 êbâo prăk/čô.

Prăk anei mâo Anôk bruă sang čư̆ êa dŭm kdriêk lehanăn Êpul mtrŭt mđĭ klei hriăm hră ƀuôn prŏng Kon Tum mtrŭt mjhar. Phung hđeh dưi đru jing mnuih djuê ƀiă amâo dah hđeh dôk hlăm gŏ êsei ƀun, hđeh êrĭt êrin mơ̆ng 28 boh sang hră hlăm čar. Mbĭt hŏng klei đru kơ mnơ̆ng dhơ̆ng, êlâo lehanăn hlăm hruê mkŏ mjing klei bi lông, êpul djŏ tuôm ăt mâo hdră đru kơ phung hđeh dleh dlan. Bruă Đoàn čar Kon Tum brei thâo, phung êdam êra ti Kon Tum mâo leh hdră kčah klă klơ̆ng čiăng hluê ngă bruă “Mđĭ ai yan bi lông” ti 12 anôk bi lông lehanăn 9 anôk mkăp kơ klei bi lông./.

                                                    Pô mblang: H’Nêč Êñuôl