VOV4.Êđê - Hlăm wưng êgao, hdră kriê dlăng lăn ala ti čar Kon Tum bi êdah lu klei êdu kƀah, đa đa mâo anôk “Ngă ngơi”. Knhal tuič, ngă lu klei amâo jăk, luič liê hlăm bruă lăn ala, liê lu ngăn drăp knŭk kna, ngă kơ lu mnuih ƀuôn sang amâo lŏ đăo knang hlăm hdră mă bruă mơ̆ng phung knuă druh kriê dlăng lăn ala ti alŭ wăl.

Pă mlan êlâo, êjai nao ngă hră lăn kơ anôk lăn gŏ sang pô dôk, amai Nguyễn Thị Thanh Thúy ti să Čư̆ H’Reng, ƀuôn prŏng Kon Tum ƀuh lăn sang pô mâo anôk ngă bruă mkă brei mrô čuê, mrô anôk msĕ hŏng mrô pô mkăn. “Leh kâo ƀuh klei anei, kâo ngă leh hră hưn mdah hŏng bruă sang čư̆ êa să, leh anăn diñu wĭt lač amâo mâo klei dưi mgaih msir bruă anei. Mñă kơ kâo lŏ ngă hră hưn mdah hŏng bruă sang čư̆ êa ƀuôn prŏng. Sa mlan ka ƀuh mơh bruă sang čư̆ êa ƀuôn prŏng wĭt lač. Mrâo anei hlăm klei bi tuôm hŏng phung bi ala kâo ăt mâo klei hưn mdah ƀiădah diñu lač bruă anei amâo mâo klei yuôm bhăn ôh. Hưn mdah hŏng gưl bruă nah dlông srăng mâo hdră mgaih msir yơh, amâo mâo klei dleh dlan ôh. Suăi êmăn êdi, kâo lŏ mă bruă knuă rông ba anak čô lĕ”.

Mrâo anei hlăm klei kƀĭn tal 3, Êpul gơ̆ng bruă ƀuôn sang čar Kon Tum gưl 12, khua bruă Đảng čar, khua kiă kriê Êpul gơ̆ng bruă ƀuôn sang čar Kon Tum Dương Văn Trang mâo leh klei ksiêm êmuh kơ klei bruă sang čư̆ êa wăl krah Đăk Hà, kdriêk Đăk Hà brei kơ Đỗ Trọng Lâm, ti êlan Hùng Vương mañ lăn mơ̆ng thŭn 2017. Ară anei ti ênhă lăn anei Đỗ Trọng Lâm tuh ƀê tông kluôm guê hnoh êa, mdơ̆ng sang čhĭ mnia ngă bruă mnia mblei. Ka Ba Thành, khua bruă Đảng kdriêk Đăk Hà lač kpă: Klei anei hmăi amâo mâo jăk kjham kơ klei đăo knang mơ̆ng bruă sang čư̆ êa alŭ wăl: “Mnuih ƀuôn sang ti alŭ wăl ƀuh klă, tơdah bruă sang čư̆ êa alŭ wăl amâo mâo brei si thâo mâo hĕ klei mâo pô čŏng ngă bruă anei. Leh klei ksiêm dlăng ƀuh wăl krah kriê dlăng awăt êdu êdi. Leh ƀuh klei anei kăn hmao mgaih msir lei, lŏ brei kơ pô anei rŭ mdơ̆ng, ngă truh klei đing mơ̆ng mnuih ƀuôn sang jing bruă sang čư̆ êa ngă klei găl, đru kơ pô anei.”

Djŏ tuôm hŏng bruă kriê dlăng lăn ala ti čar Kon Tum, hlăm boh tŭ klei ksiêm duah mrô 222 hruê 18/2/2022 mơ̆ng êpul ksiêm duah knŭk kna ktrâo klă leh lu klei awăt êdu, klei ngă soh msĕ si: wưng thŭn 2016 – 2019, bruă sang čư̆ êa čar Kon Tum ngă êmưt bruă bi klă hdră yua lăn ti 10 kdriêk, ƀuôn prŏng, 85 klei jao lăn amâo mâo dôk hlăm klei bi lông blei ti kdriêk Đăk Hà, hdră mkăp bruă mnia mblei, hlăp lêñ, hlăp mbul leh anăn sang ti ƀuôn prŏng mơ̆ng Êpul grŭp FCL jing pô duh bi liê ka ngă bi leh ôh adŭ bruă bi klă klei yua lăn ƀiădah čar Kon Tum brei leh hră lăn, hră kiă kriê sang dôk, ngăn dŏ mkăn nao mbĭt hŏng lăn leh anăn čŏng pô mbha čuê ti ênhă êbeh 17.600 m², bruă ba jao lăn kơ 43 čô ti alŭ wăl ƀuôn prŏng nah dhŭng kban Đăk Bla, ƀuôn prŏng Kon Tum amâo mâo djŏ phung lŏ wĭt dôk mrâo….Mbĭt hŏng dŭm klei awăt êdu hlăm bruă čuăl mkă, kriê dlăng klei čuăl mkă, hrui wĭt lăn, ăt msĕ hŏng klei mgaih msir êmưt, ƀuah mkra lei ngă soh, ngă kơ lu mnuih ƀuôn sang Kon Tum luč klei đăo knang kơ êpul phung bruă knŭk kna hlăm bruă kriê dlăng lăn ala ti alŭ wăl. Amai Phạm Thị Vân Kiều, ti ƀuôn prŏng Kon Tum mâo lăn kpăk hŏng hdră čuăl mkă brei thâo: “Djăp anôk mâo klei čuăl mkă sơăi. Mnuih ƀuôn sang hmăng hmưi dưi hdĭp mda ti lăn ala digơ̆ pô, čuăl mkă amâo mâo brei ngă sa mta bruă ôh, ti anôk lŏ mâo klei đăo knang, anôk anei, anôk dih čuăl mkă jih, djăp anôl hrui mă sơăi.”

Phạm Văn Trúc, sa čô knuă druh leh jih thŭn mă bruă, ti êlan Hùng Vương, wăl krah Đăk Hà, kdriêk Đăk Hà bi êdah: “Gưl dlông ngă bruă ktang phĭt, mnuih ƀuôn sang hmei mâo klei đăo knang êdi. Ƀiădah hŏng grăp čô mnuih ƀuôn sang, hŏng grăp čô đảng viên ti alŭ wăl čar Kon Tum kâo ƀuh bruă anei hŏng čar ka đei mâo klei uêñ mĭn ôh. Mâo lu klei lŏ êdah leh klei ksiêm duah, leh klei ksiêm dlăng mâo leh dŭm bruă hluê si klei bi klă ƀiădah ka dưi ngă mơh. Mâo dŭm anôk lač dah dleh dlan srăng mgaih msir ƀrư̆ ƀrư̆. Hmăng hmưi bruă anei srăng dưi ngă tač hnơ̆ng”.

Giăm anei hlăm dŭm klei bi kƀĭn msĕ si: klei kƀĭn tal 3, Êpul gơ̆ng bruă ƀuôn sang čar Kon Tum gưl 12, klei blŭ hrăm mơ̆ng bruă sang čư̆ êa čar Kon Tum hŏng dŭm knơ̆ng bruă, klei kƀĭn ksiêm wĭt boh tŭ bi mlih klei ngă hră mơar knŭk kna, bi hơĭt wăl duh bi liê mơ̆ng bruă Đảng čar Kon Tum… Khua gĭt gai bruă Đảng čar, bruă sang čư̆ êa čar Kon Tum bi êdah leh klei gĭr hlăm bruă ƀuah mkra klei soh, mgaih msir klei dleh kpăk, ƀuăh mkra ktang phĭt phung ngă truh klei dleh kpăk, kei rŭng răng êjai mnuih ƀuôn sang, knơ̆ng bruă nao ngă hră mơar djŏ tuôm hŏng lăn ala. Ƀiădah, tơdah čiăng lŏ kơrŭ wĭt klei đăo knang mơ̆ng mnuih ƀuôn sang hlăm bruă kriê dlăng lăn ala, knŏng klei gĭr ktưn jing ka djăp ôh, dŭm anôk bruă, dhar bruă djŏ tuôm, dŭm gưl bruă sang čư̆ êa čar Kon Tum čiăng rơ̆ng amâo mâo bruuă klei gĭt ktưn, ktrâo lač mơ̆ng gưl bruă nah dlông lĕ hlăm klei “dlông hlơr ti gŭ êăt” amâodah “tông hgơr lui mnoh”.

Y-Ƀel pô mblang