VOV4.Êđê-Ti čar Kontum, hlăm dŭm hrue êgao ênoh mnuih djŏ covid 19 đĭ nanao lehanăn yap truh hrue mbrue ênoh mnuih ruă hlăm čar êgao leh 6 êbâo čô mnuih. Êlâo anăn dua hrue 21 lehanăn 22/2 anôk bruă mdrao mgŭn čar Kontum čih yap mâo truh 344 čô mnuih djŏ. Klei dôk hyưt êdi jing Kontum hlăk dơ̆ng mâo klei ruă anei hlăm krĭng taih kbưi, krĭng mnuih djuê ƀiă hdĭp mda.

Čiăng mđĭ hĭn bruă mdrơ̆ng hŏng klei ruă tưp, Êpul kiă kriê bruă mdrơ̆ng hŏng klei ruă tưp čar Kontum mtă kơ jih jang mnuih brei mâo ai tiê êđăp ênang, amâo mâo huĭ hyưt kdjăt kƀla, mâo klei bi mguôp kjăp hŏng knŭk kna hlăm bruă mdrơ̆ng hŏng klei ruă tưp, hlue nga 5 mta klei mtă lehanăn tlŏ vaccine, êjai dôk mdrơ̆ng hŏng klei ruă tưp bi hlue gưt kjăp klei phŭn bruă mdrao mgŭn, boh nik truă čhiăm guôm ƀô̆ tơdah kbiă mơ̆ng sang, lehanăn tlŏ bi ênŭm vaccine gang mkhư̆ klei ruă tưp covid 19./.

Pô mblang: Y-Khem Niê