VOV4.Êđê- Krĭng wăl Lăn Dap Kngư dôk mprăp mŭt hlăm yan hjan, hbâo pruê kơ ana pla mjing. Ară anei, hŏng ênoh hbâo pruê dôk đĭ lu, ti čar Kon Tum phung pla kphê ti kdriêk Đăk Hà lŏ dơ̆ng ƀuh lu klŭng hbâo pruê sinh học An Thái NPK kƀah hnơ̆ng ktrŏ.

Êlâo kơ tết Nguyên đán Nhâm Dần thŭn 2022, Nguyễn Văn Trung, sang ti alŭ anôk dôk mrô 2B, wăl krah Đăk Hà, kdriêk Đăk Hà, čar Kontum jing mnuih ngă bruă hlăm knơ̆ng bruă kphê 731, hlăm knơ̆ng bruă kphê Việt Nam tŭ mă êlâo 20 kdô hbâo sinh học An Thái NPK, hŏng ênoh grăp kdô 50kg, pioh prue kơ kphê. Êjai klam dŭ kdô hbâo pruê anăn, ƀuh hdjul srueh mkă hŏng yăng đar, snăn lông nao mkă hŏng knăng, snăn kƀah sơăi tui si klei čih hlăm kdô:

“Kâo tŭ mă ênoh hbâo pruê anei mơ̆ng knơ̆ng bruă kphê 731. Kâo mă ba wĭt hlăm brô hrue 26; 27 tết. Pô jing mnuih pla mjing, klam kdô ƀuh hdjul bul, snăn kâo bi mĭn năng ai kƀah leh, snăn lông nao mkă hŏng knăng. Ƀuh kƀah êdi snăn nao hưn hŏng khua êpul anôk mă bruă”.

Nguyễn Văn Trang, pô thâo ƀuh dŭm klŭng hbâo pruê amâo djăp boh ktrŏ

        Dơ̆ng mơ̆ng leh Nguyễn Văn Trung hmao ƀuh kdô hbâo amâo mâo djăp hnơ̆ng ktrŏ, lu mnuih ngă bruă mkăn ăt tŭ mă hbâo mơ̆ng knơ̆ng bruă Kphê 371 bi nao mkă sơăi, snăn dŭm boh klŭng hbâo lu jing kƀah mơ̆ng 1 - 1,5kg. Bùi Đình Kiên, sang ti alŭ anôk dôk mrô 2A, wă krah Đăk Hà, kdriêk Đăk Hà, brei thâo:

“Gŏ sang kâo nao mă mâo 10 kdô 500kg, bi ung adei nao mă truh kơ 1 tôn. Lŏ wĭt mkă jih jang ƀuh luič hlăm brô mơ̆ng 1 – 1,5kg. Ƀuh klei msĕ djuê anăn msĕ si amâo lŏ mâo klei đăo knang ôh hŏng knơ̆ng bruă. Hmei dlăng kriê mjut mjing asăr kphê jing suăi êmăn leh. 2kg kphê ka tloh mơh blei sa kg hbâo, ƀiădah hbâo ară anei dôk lač kơ ênoh đuič, ka jhŏng lač ôh kơ hnơ̆ng jăk”.

Sa klŭng hbâo pruê sinh học An Thái NPK amâo djăp boh ktrŏ

Hmư̆ klei phung ngă bruă hưn kơ hbâo sinh học An Thái NPK amâo mâo djăp ôh boh ktrŏ kơ sa klŭng, snăn knơ̆ng bruă kphê 371 nao ksiêm dlăng, bi klă kơ grăp kdô hbâo kƀah 1,2kg hbâo mkă hŏng ênoh čih hlăm kdô, lehanăn tui si klei bi kuôl kă mnia mblei. Nguyễn Hữu Tư, k'iăng khua knơ̆ng bruă brei thâo, ênoh hbâo anei, knơ̆ng bruă mă truh 2 êbâo 256 kdô mơ̆ng knơ̆ng bruă mkăp hbâo prue SVD mâo anôk bruă ti Kontum pioh mbha kơ mnuih ngă bruă pioh duh kơ bruă. Êjai hlăm klei ngă bruă hŏng knơ̆ng bruă kphê 371, pô bi ala mơ̆ng anôk bruă čhĭ hbâo pruê jing Lê Quang Dũng, hlŏng jing khua kiă kriê hưn lač, klei kƀah anăn mâo hlăm grăp kdô, kbiă hriê mơ̆ng anôk mkra mjing đŭng hruh. Kơ kdrêč srăng mghaih msir ênoh hbâo kƀah anăn, Nguyễn Hữu Tư lač, êpul bruă diñu srăng đua klam:

“Tal êlâo Dũng yơh srăng đua klam kơ ênoh hrŏ anăn hbâo hŏng mnuih ngă bruă. Tal dua ih pô mtam yơh nao akâo klei pap mñai ti anăp jih jang phung ngă bruă mơ̆ng knơ̆ng bruă kphê”.

Leh ksiêm nik dưi thâo mâo leh ƀiă êdi 3 thŭn knơ̆ng bruă kphê 371 hlăm knơ̆ng bruă kphê Việt Nam ti kdriêk Đăk Hà, čar Kontum ngă klei kuôl kă mnia mblei hbâo sinh học An Thái NPK hŏng knơ̆ng bruă mkăp hbâo pruê SVD kơ mnuih ngă bruă pioh prue kơ kphê. Jih jang klei čih hlăm kdô hbâo sinh học An Thái NPK dôk tuôm hŏng klei kƀah hnơ̆ng ktrŏ anăn brei ƀuh, hbâo anei pioh pruê kơ djăp mta mnơ̆ng pla, lehanăn mâo mkra mjing ti knơ̆ng bruă mkra mjing hbâo brŭ An Thái, ti trăn C4B, alŭ wăl duh mkra Hòa Bình, ƀuôn prŏng Kontum, čar Kontum./.

Pô mblang: Y-Khem Niê