Thŭn hriăm 2024 – 2025 čar Kon Tum mâo êbeh 167.000 čô hđeh hriăm hră, hlăm anăn mâo êbeh 98.000 čô hđeh hriăm hră mnuih djuê ƀiă. Mơ̆ng hruê 12/8, phung hđeh sang hră adŭ 1 mnuih djuê ƀiă mơ̆ng čar dưi nao sang hră čiăng kơ phung nai mtô klei Yuăn, đru kơ digơ̆ čhuang mŭt hlăm thŭn hriăm mrâo. Dŭm  alŭ ƀuôn, phung amĭ ama hđeh ăt uêñ mĭn kơ phung anak čô. Amai Y Hrâm, ti ƀuôn Kon Vơng Kia, wăl krah Măng Đen, kdriêk Kon Plông brei thâo:

 “Mprăp mŭt hlăm thŭn hriăm mrâo, gŏ sang kâo blei leh kơ anak čhum ao, jep čŭt, kdô gui, giê čih, hdruôm hră mơar…Gŏ sang ăt tla djăp prăk akŏ thŭn hriăm leh anăn blei djăp mnơ̆ng yua hriăm hră. Mơ̆ng sang truh kơ sang hră ăt kbưi kyuanăn gŏ sang ăt mprăp êdeh atăt, nao drông anak, čiăng kơ anak dưi hriăm hơĭt, hmăng hmưi thŭn hriăm mrâo anôk pô hriăm thâo.

Thŭn hriăm mrâo 2024 – 2025, bruă mtô mjuăt bi hriăm čar Kon Tum bi myuôm hluê ngă klei mtrŭt mjhar “Bi mlih knhuah mĭn, hdră mơ̆ng mnuih djuê ƀiă, đru kơ digơ̆ gĭr ktưn tlaih ƀun hŏng klei kjăp, pŏk mlar klei bi hmô đru rông ba hđeh sang hră, mđĭ hnơ̆ng phung hđeh sang hră jing mnuih djuê ƀiă leh anăn gang mkhư̆ klei kbiă sang hră.”