VOV4.Êđê-  Bruă sang čư êa čar Kon Tum mrâo mkŏ mjing klei kƀĭn bruă klei mrâo hâo hưn kơ bruă ba mdah, hluê ngă klei bi klă mrô 222 hruê 18/2/2022 mơ̆ng pô ksiêm duah mơ̆ng knŭk kna. Nguyễn Hữu Tháp, k’iăng khua bruă sang čư êa čar Kon Tum brei thâo: bruă sang čư êa čar gĭt gai leh kơ dŭm anôk bruă, alŭ wăl mjêč ksiêm dlăng, mgaih msir dŭm klei dôk kpăk mâo leh pô ksiêm duah mơ̆ng knŭk kna ktrâo klă.

Bi kơ dŭm klei ngă soh hlăm bruă ksiêm dlăng klei yua lăn, bruă ksiêm dlăng duh bi liê bruă mkŏ mkra, čuăl mkă bruă mkŏ mkra, čuăl mkă ƀuôn prŏng… mâo leh phung ksiêm duah mơ̆ng knŭk kna bi klă, bruă sang čư êa čar Kon Tum srăng gĭt gai dŭm anôk bruă, alŭ wăl djŏ tuôm srăng hluê ngă jăk, rơ̆ng djŏ hŏng klei bhiăn ară anei. Bi kơ bruă tlĕ ƀơ̆ng prăk anăn knăl Sâm Ngọc Linh, khua gĭt gai knơ̆ng bruă lŏ hma leh anăn mđĭ kyar krĭng ƀuôn sang čar Kon Tum brei thâo, ară anei mâo lu êpul êya, grăp čô mčua anăn knăl sâm ngọc Linh čiăng ba čhĭ mnơ̆ng dhơ̆ng hlăm anôk mnia mbei leh anăn hlăm mbah internet. Čar srăng ngă bruă ksiêm dlăng čiăng bi hrŏ klei anei

Pô mblang: Y-Ƀel Êban