VOV4.Êđê- Hâo hưn mơ̆ng Knơ̆ng bruă ksiêm dlăng dliê kmrơ̆ng čar Kon Tum aguah hruê 9/9 brei thâo, Anôk bruă ksiêm dlăng dliê kmrơ̆ng kdriêk Sa Thầy kčŭt hưn leh klei uă druôm kyâo soh hdră bhiăn mâo ti alŭ wăl kdriêk. Leh ba mdah klei bi mklă kčŭt hưn bruă ngă soh jhat kơ klei ngă soh hŏng klei kčah mtrŭn bruă ba yua, răng mgang dliê lehanăn mnơ̆ng hlăm dliê’, Anôk bruă ksiêm dlăng dliê kmrơ̆ng kdriêk Sa Thầy ba leh hră m’ar kơ Anôk bruă kahan ksiêm kdriêk Sa Thầy ksiêm dlăng, msir mghaih djŏ hdră bhiăn.

Boh klei anei hmao ƀuh kdrêč dliê mâo Anôk bruă dliê kmrơ̆ng Sa Thầy kriê dlăng, hlăm să knông lăn Mô Rai, kdriêk Sa Thầy. Anôk dliê rai anei êlan găn êrô dleh dlan, kbưi hŏng krĭng mnuih ƀuôn sang dôk lehanăn êlan dơ̆ng 14C êbeh 10 km.

Klei anei hmao ƀuh hruê 2/9/2022, êpul răng mgang dliê kmrơ̆ng Sa Thầy čih yap mâo 32 phŭn kyâo arăng uă druôm êbeh 40m3, mâo kyâo mta III lehanăn VIII./.

Pô mblang: H’Nêč Êñuôl