Aguah 20/4, ti ƀuôn prŏng Kon Tum, bruă Đảng čar Kon Tum mkŏ mjing Klei bi kƀĭn ksiêm wĭt 10 thŭn hlue ngă Hdră mtrŭn gưl dlông 8 gưl XI kơ hdră răng mgang čar kwar hlăm boh klei mrâo. Đại Tướng Tô Lâm, Khua hlăm Phŭn bruă kđi čar, Khua phŭn bruă kahan ksiêm, nao leh anăn blŭ hrăm gĭt gai hlăm Klei bi kƀĭn, čih yap, bi mni kơ boh tŭ bruă Đảng čar Kon Tum mâo leh 10 thŭn hlue ngă Hdră mtrŭn mơ̆ng Gưl dlông kơ hdră răng mgang čar kwar hlăm boh klei mrâo.

Lač kơ hdră kñăm, hdră msir răng mgang čar kwar mơ̆ng Bruă Đảng čar Kon Tum hlăm boh klei mrâo, Đại tướng Tô Lâm, mñă klă: brei kƀĭn gĭt gai leh anăn mjing klei bi mlih ktang hlăm bruă mkŏ mjing hlue ngă hdră êlan mơ̆ng Đảng čiăng răng mgang čar kwar, rơ̆ng bruă răng mgang klei êđăp ênang. Lŏ dơ̆ng mkra mđĭ êpul bi hgŭm jih jang djuê ana mguôp hŏng bruă răng mgang leh anăn mđĭ kyar dhar kreh mjing tur knơ̆ng kjăp kơ bruă răng mgang čar kwar hlăm boh klei mrâo./.