VOV4.Êđê -  Aguah hruê 2/6, ti kdriêk Đăk Hà, bruă Đoàn čar Kon Tum mkŏ mjing leh Knăm trŭn kơ hdră bruă êdam êra ba anăp yan mdei prŏng thŭn 2022. Hdră anei mâo dŭm bruă msĕ si: Đoàn viên, êdam êra nao hgŭm hlăm hdră mkŏ mkra krĭng ƀuôn sang mrâo, răng mgang wăl hdĭp mda, mdrơ̆ng hŏng klei bi mlih yan adiê; Mđing dlăng kriê phung hđeh êlăk, đru kơ mnuih ƀuôn sang hmăi djŏ mơ̆ng klei ruă COVID-19; Mtô mblang kơ Hdră bhiăn êdam êra, bi mŭt Đoàn viên mrâo… Ti knăm anei, bruă Đoàn čar Kon Tum mđup brei leh 50 hnư mnơ̆ng kơ phung hđeh mâo klei hdĭp dleh dlan gĭr hriăm hră thâo; Mđup hruh mnơ̆ng yua kơ 10 gŏ sang êdam êra mnuih djuê ƀiă, gŏ sang hluê đăo dleh dlan; Hưn mthâo gru hmô hrui mƀĭn djah djâo ksu ti alŭ wăl krĭng ƀuôn sang lehanăn gru hmô pla ana kyâo, mdrơ̆ng hŏng klei bi mlih yan adiê; Mđup brei 1 êbâo kčok êa ksâo kơ phung hđeh mâo klei hdĭp dleh dlan; Pah mni 9 êpul êya lehanăn 9 čô mnuih mâo boh tŭ êdah êdi hlăm bruă pŏk ngă Mlan êdam êra thŭn 2022./.

Aguah mbrue, ti ƀuôn prŏng Pleiku, bruă êdam êra čar Gialai mkŏ mjing “Knăm êdam êra trŭn kơ bruă yan mdei prŏng thŭn 2022” mâo truh 350 čô êdam êra nao hgŭm. Bruă hlăm thŭn anei, Êpul kiă kriê bruă êdam êra čar Gialai mkŏ mjing leh 5 êpul êdam êra ba anăp ngă dŭm bruă bi đru hlăm jih 3 mlan mdei prŏng. Mđing nao tal êlâo ti dŭm să knông lăn, dŭm să hlăk dôk mkŏ mkra krĭng ƀuôn sang mrâo bi djăp ênoh čuăn hlăm thŭn anei. Bruă anei, phung mda asei Gialai ktưn wĭt mkra ngă mrâo truh 15km êlan hlăm krĭng ƀuôn sang, pla mrâo 150 êbâo phŭn kyâo, mdơ̆ng mâo 3 boh sang bi đru, mkă dlăng mdrao mgŭn, lehanăn kčĕ kơ mnơ̆ng ƀơ̆ng huă kơ 1 êbâo čô mnuih, mkra mrâo lehanăn mkra wĭt 8 boh sang tlô ti sang hră, mjuăt bi hriăm kơ klei duah bruă knuă hŏng phung êdam êra./.

H’Nêč – Y Khem pô mblang