VOV4.Êđê - Hlăm 2 hruê êgao, boh klei Chu Ngọc Anh, Khua hđăp anôk bruă sang čư̆ êa ƀuôn prŏng Hà Nội lehanăn Nguyễn Thanh Long, Khua hđăp Phŭn bruă mdrao mgŭn brei kbiă mơ̆ng Đảng, lui jih bruă klam, mâo kčŭt hưn, mă kơ̆ng êjai jing klei hưn mâo phung knuă druh, Đảng viên lehanăn mnuih ƀuôn sang čar Kon Tum mđing dlăng. Trương Duy Cảnh, 69 thŭn, 40 thŭn Đảng dôk ti sang mrô 104, êlan Phạm Văn Đồng, ƀuôn hgŭm Lê Lợi, ƀuôn prŏng Kon Tum hưn lač, hdră bi kdơ̆ng hŏng klei ƀơ̆ng ngăn jing bruă klam, brei ngă nanao mơ̆ng Đảng.

Ƀiădah ñu ka tuôm ƀuh bruă anei dưi ngă hŏng klei ktang, kjăp msĕ ară anei. Mơ̆ng boh klei Chu Ngọc Anh lehanăn Nguyễn Thanh Long, ñu lŏ mâo klei đăo knang hĭn hlăm hdră bi kdơ̆ng hŏng klei ƀơ̆ng ngăn mơ̆ng Đảng lehanăn mơ̆ng Khua gĭt gai Đảng Nguyễn Phú Trọng:    Kâo đăo knang êdi kơ Đảng drei hluê ngă ktang lehanăn kjăp hŏng hlei pô mčhua hŏng klei dưi čiăng prăk kăk mnuih ƀuôn sang, mơ̆ng ngăn ala čar, toh hroh klei mĭn, knhuah hdĭp. Mrâo anei, Khua phŭn bruă mdrao mgŭn Nguyễn Thanh Long lehanăn Chu Ngọc Anh, mâo bruă klam prŏng, ƀiădah amâo djŏ mâo bruă prŏng si čiăng ngă ôh. Kâo čang hmăng drei srăng hgŭm kngan mkŏ mkra lehanăn hgŭm kngan bi kdơ̆ng hŏng klei ƀơ̆ng ngăn, klei toh hroh hlăm klei mĭn, knhuah hdĭp mơ̆ng phung knuă druh, đảng viên”. 

H’ Nêč pô mblang