VOV4.Êđê -  Leh dŭm yan mdei sui hlăm sang čiăng gang mkhư̆ klei ruă Covid-19, yan mdei prŏng thŭn anei phung hđeh hlăk krah, phung hđeh điêt ti čar Kon Tum dưi hgŭm hlăm dŭm bruă ngă pô khăp. Păn kjăp klei anei, dŭm Anôk bruă, sang Dhar kreh, êpul bruă, phung ti Kon Tum mjing leh lu tač hlăp kơ hđeh čiăng diñu mâo thiăm klei ruah mđĭ kyar klei thâo pô.

Amâo uêñ kơ adiê dôk mđiă ktang, hlơr hĭp hlăm yan anei, sa êpul mâo 30 čô hđeh mơ̆ng adŭ 6 truh kơ 8, Sang hră gưl 2 Nguyễn Sinh Sắc ti ƀuôn prŏng Kon Tum dôk hriăm klei thâo kơ hdră bruă Đội. Adei Lã Đình Hòa An, hđeh adŭ 6Y, brei thâo adei mâo klei thâo kơ bruă anei kyua anăn adei nao bi mklă lŏ hriăm mbŏ klei thâo kơ hdră bruă Đội mâo Anôk bruă Dhar kreh mjuăt ktang asei mlei phung hđeh êdam êra čar Kon Tum pŏk hlăm yan mdei prŏng. Hŏng Lã Đình Hòa An, yan thŭn anei m’ak lehanăn jăk jĭn êdi:“Yan mdei prŏng thŭn anei hmei dôk dôk hlăp čhưn lehanăn hriăm nbĭt čiăng nao hgŭm hlăm dŭm hdră bruă ƀuh m’ak êdi kyua leh 2 thŭn mâo Covid 19 ară anei kơh lŏ dưi dôk hriăm mbĭt. Dưi bi tuôm hŏng lu ƀĭng găp, bi trông, kah mbha klei thâo, bi hdơr dŭm klei mâo pô lui hĕ hlăm wưng bluh mâo klei ruă Covid 19. Yan mdei prŏng anei, êngao adŭ anei, kâo srăng nao hgŭm hlăm dŭm hdră bruă mkăn msĕ si hriăm luê, čih kač rup”..

Klei ruă Covid 19 dưi ksiêm dlăng, yan mdei prŏng anei kruăk knăl klei lŏ wĭt ngă bruă mơ̆ng lu tač hlăp kơ phung hđeh lehanăn mđing lu êdi ti ƀuôn prŏng Kon Tum. Mbĭt hŏng dŭm adŭ mjuăt bi hriăm mơ̆ng dŭm anôk bruă, sang dhar kreh, phung amĭ ama dưi ruah dŭm adŭ mjuăt bi hriăm klei thâo mâo êpul, mnuih pŏk bi hriăm čiăng đru kơ anak pô mđĭ klei thâo. Amai Đặng Linh Ngọc, amĭ ĕ Nguyễn Đặng Gia Hân, 6 thŭn, dôk ti êpul mrô 1, ƀuôn hgŭm Duy Tân brei anak nao hriăm kdŏ ti êlan Hoàng Thị Loan, brei thâo “Ƀuh anak ti sang thâo kdŏ, mmuñ lehanăn čih kač rup. Phung anak hriăm jih leh ti sang hră, êngao mmông hriăm ti sang kâo ăt čiăng brei phung anak lŏ nao hriăm ti sang dhar kreh lehanăn hlăp čhưn tinei mơh đa. Tal dua, phung anak dưi kpư̆ mjuăt asei mlei, mjuăt ai ktang, suaih pral jăk hĭn mkă hŏng brei dôk ti sang. Ăt hmư̆ phung amĭ ama mkăn hưn mthâo kơ anôk anei kyua anăn kâo čiăng mơh anak ti sang mđĭ hĭn klei thâo gơ̆ pô.

Yan mdei prŏng thŭn anei, mbĭt hŏng dŭm adŭ mjuăt bi hriăm klei thâo juăt mưng leh msĕ si: Čih kač rup, pĕ brô̆, Organ, wưng hriăm ngă kahan… phung hđeh ti Kon Tum lŏ mâo lu klei hrŏng ruah mrâo, msĕ si: hdră tui ksiêm kơ lăn adiê mnơ̆ng dhơ̆ng hdĭp, Boh sang phung hđeh điêt, Kdŏ tik tok… Ti anăp klei čiăng mjuăt bi hriăm, mđĭ klei thâo kơ phung hđeh, ti čar Kon Tum, êngao kơ dŭm klei bhiăn dhar kreh mơ̆ng knŭk kna hlăm yan mdei prŏng lŏ mâo klei nao hgŭm mơ̆ng lu êpul, mnuih hlăm bruă mkŏ mjing tač hlăp kơ phung hđeh. Hluê si Phạm Văn Thắm, K’iăng khua Anôk bruă Dhar kreh mjuăt ktang asei mlei phung hđeh êdam êra čar Kon Tum, anei jing sa klei bi êdah jăk, mđĭ ai bi ktưn lehanăn ba wĭt klei tŭ dưn kơ phung hđeh.“Anăn jing dhar kreh hlăm êpul êya yang ƀuôn. Dưi lač wăl anôk dhar kreh arăng ngă bruă dhar kreh lu snăk. Adŭ hriăm kdŏ, mmuñ, pĕ brô̆. Ti êngao ngă bruă anei mơh amâo djŏ msĕ sui hŏng anei 10 thŭn knŏng mâo dŭm anôk bruă đuič, amâo mjing ai bi ktưn. Brei duh bi liê kjăp kơ kdrăp mnơ̆ng dhơ̆ng, anak mnuih snăn kơh dưi jak iêu lu phung hđeh. Lehanăn hriăm mđĭ klei thâo jing klei čŏng pô čiăng nao hriăm, amâo thâo mgô̆ hđeh ôh.

Leh dŭm yan mdei prŏng lu jing dôk ti sang kñăm gang mkhư̆ klei ruă Covid 19, yan mdei prŏng thŭn anei, phung hđeh êlăk ti čar Kon Tum dưi nao hgŭm hlăm dŭm hdră bruă mâo phung hđeh khăp čiăng. Dŭm adŭ mjuăt bi hriăm klei thâo, hdră tui ksiêm ară anei mâo lu phung hđeh nao hgŭm. Dŭm anôk bruă, sang dhar kreh mbĭt hŏng dŭm êpul, mnuih ti čar Kon Tum ăt dôk mđing truh kơ dŭm hdră bruă ti krĭng taih kbưi čiăng mjing lu tač hlăp kơ phung hđeh hlăm yan mdei prŏng thŭn anei./.