Čiăng gang mkhư̆ klei pui ƀơ̆ng dliê, dŭm pô dliê mbĭt hŏng êpul djŏ tuôm mơ̆ng alŭ wăl mđĭ leh mnuih, kdrăp mnơ̆ng gang mkhư̆ klei pui ƀơ̆ng dliê jih hruê mlam. Ti dŭm kdriêk Đăk Tô, Đăk Hà, Sa Thầy, Kon Braih, Ngọc Hồi, Đăk Glei, anôk mâo čar Kon Tum bi mklă huĭ srăng mâo klei pui ƀơ̆ng dliê lu hĭn, dŭm êpul êya, pô dliê, anôk bruă djŏ tuôm lehanăn bruă sang čư̆ êa mơ̆ng Kon Tum lŏ mkŏ mjing dŭm anôk gak răng, ksiêm dlăng kjăp mnuih mŭt kbiă hlăm dliê, mđĭ êpul nao gak răng mnuih ƀuôn sang êuh ênah ngă pưk hma, ksiêm dlăng kjăp amâo lui pui hlô̆ ƀơ̆ng lar hlăm dliê.

Mbĭt anăn, êpul lĭng kahan, kahan ksiêm bi hgŭm hŏng êpul bruă dliê kmrơ̆ng, pô dliê lehanăn bruă knŭk kna alŭ wăl mprăp djăp mnuih, kdrăp mnơ̆ng nao truih mdjiê klei pui ƀơ̆ng tơdah tăm mâo pui ƀơ̆ng./.