Hruê 18/5, ti ƀuôn prŏng Kon Tum, Anôk dlăng bruă Đảng čar Kon Tum mkŏ mjing Klei bi kƀĭn ksiêm wĭt 2 thŭn hlue ngă Klei klah čŭn mrô 1 mơ̆ng Phŭn bruă kđi čar kơ klei “Mđĭ ktang tui hriăm leh anăn hlue ngă knhuah mngač Hồ Chí Minh”, mbĭt anăn bi mni kơ êpul, phung êdah êdi hlăm klei tui hriăm leh anăn hlue ngă tui si Awa Hồ. 2 thŭn êgao čar Kon Tum mkŏ mjing leh giăm 1.300 gru hmô jăk, hdră ngă tŭ dưn hlăm bruă anei, msĕ si” ênai mông hriăm hră”, “Sang hră jăk mơak” mơ̆ng bruă sang hră mtô bi hriăm, “Knăm pă mđing kơ ƀuôn sang” mơ̆ng bruă Đảng kdriêk Đăk Glei, “Hbŭ braih klei khăp” mơ̆ng bruă Đảng kdriêk Ngọc Hồi”…

Bruă mđĭ  ktang klei hriăm leh anăn hlue ngă knhuah mngač Awa Hồ đru mđĭ klei thâo săng, bruă klam mơ̆ng dŭm gưl bruă Đảng, êpul bruă đảng, anôk bruă hlue ngă bruă kđi čar dưi jao, ni mlih hlăm klei mĭn mă bruă mơ̆ng êpul knuă druh, phung mă bruă knŭk kna hlue si hdră ƀrư̆ mrâo mrang, tŭ dưn. Anôk dlăng bruă Đảng čar Kon Tum mtă kơ dŭm gưl, dhar bruă, alŭ wăl hlăm čar lŏ dơ̆ng mlih mrâo hdră, hnơ̆ng čiăng kơ bruă tui hriăm Awa Hồ dưi ngă nanao hlăm grăp čô mnuih…