VOV4.Êđê - Hruê mbruê 1/6, knơ̆ng bruă dhar kreh, mjuăt ktang asei mlei leh anăn hiu čhưn ênguê čar Kon Tum mkŏ mjing leh knăm ksiêm wĭt leh anăn mđup brei klei pah mni klei bi lông kêč rup phung hđeh, hŏng akŏ “Anôk hlăp lêñ adei hmăng hmưi”.

Leh 5 mlan mtrŭt mjhar, êpul mkŏ mjing klei bi lông anei dưi tŭ mă êbeh 5.700 rup kêč mơ̆ng phung hđeh sang hră gưl 1 leh anăn gưl 2 ti alŭ wăl čar Kon Tum. Găn leh gưl hrŏng ruah, 200 pŏk rup kêč êdah êdi dưi nao hlăm gưl hrŏng ruah knhal tuč leh anăn dưi ba mdah ti sang rang mdah – sang dlăng hră čar Kon Tum. Mbĭt hŏng knăm ksiêm wĭt leh anăn mđup brei klei pah mni klei bi lông kêč rup phung hđeh, ƀri wưng hruê phung hđeh tar rŏng lăn, hlăm dŭm hruê anei ti čar Kon Tum ăt dôk mâo lu bruă ngă bi êdah klei uêñ mĭn, kriê dlăng phung hđeh, gưl mnuih mgĭ dih kơ ala čar.

Y-Ƀel pô mblang